༧གོང་ས་མཆོག་གིས་ཐུགས་རྗེ་ཆེན་པོའི་བཀའ་དབང་གི་སྟ་གོན་སྐབས། བོད་ནང་གི་བོད་མི་ཚོ་དང་རྒྱ་རིགས་གྲོགས་པོ་ཚོར་དམིགས་འོག་ཏུ་གཙོ་བོར་བཅུག་ཡོད་པར་བཀའ་སྩལ་པ།

• 2022-06-01

བོད་མིའི་དབུ་ཁྲིད་༧གོང་ས་མཆོག་གིས་ས་ག་ཟླ་བའི་སྐབས་དང་བསྟུན། བོད་མི་གཞོན་སྐྱེས་ཚོར་ནང་ཆོས་ངོ་སྤྲོད་ཀྱི་མཛད་རིམ་ཕྱི་ཟླ་ ༦ པའི་ཚེས་ ༡ ཉིན་དབུ་འཛུགས་གནང་སྐབས། ༧གོང་ས་མཆོག་གིས་འཕགས་པ་ཐུགས་རྗེ་ཆེན་པོའི་བཀའ་དབང་གི་སྟ་གོན་དང་འབྲེལ། “འདི་གར་དངོས་སུ་ཡོད་པ་ཚོ་ཨ་ཅང་ཅང་བརྗོད་མེད་ཐོག། བོད་ནང་གི་རྒྱ་ཆེའི་མི་དམངས་མཐའ་གཅིག་ཏུ་དད་དམ་གཡོ་བ་མེད་པར་ཡོད་པ་ཚོ་དམིགས་འོག་ཏུ་གཙོ་བོར་བཅུག་ཡོད་པ་དང་། དེ་ནས་རྒྱ་རིགས་གྲོགས་པོ་ཚོ་ཡང་དམིགས་འོག་ཏུ་བཅུག་ནས་དབང་གནང་རྒྱུ་ཡིན་པ།” བཀའ་སྩལ་གནང་གི་འདུག
གཞན་ཡང་༧གོང་ས་མཆོག་གིས་རྟེན་འབྲེལ་བསྟོད་པའི་བཀའ་ཁྲིད་ཀྱི་ལམ་ནས་ནང་ཆོས་ངོ་སྤྲོད་ཕེབས་ཏེ། སོ་སོའི་མི་ཚེ་སྐྱེལ་ཐབས་སོགས་སུ་མཚན་ཉིད་རིག་པའི་རིགས་ལམ་གྱིས་ཕན་ཐོགས་ཆེན་པོ་ཡོད་པས། ནང་པ་དང་ཆོས་པ་ཡིན་དགོས་དོན་མེད་པར་གཞོན་སྐྱེས་ཚོས་རིགས་ལམ་སྦྱང་དགོས་པ་བཀའ་གནང་གི་འདུག
རྡ་རམ་ས་ལ་ནང་ཆོས་ངོ་སྤྲོད་ཚོགས་ཆུང་གིས་གོ་སྒྲིག་གནང་བ། ༧གོང་ས་མཆོག་གིས་ནང་ཆོས་ངོ་སྤྲོད་ཀྱི་མཛད་རིམ་དེར། རྡ་རམ་ས་ལའི་ནང་ཆོས་ངོ་སྤྲོད་ཚོགས་ཆུང་གི་ཚོགས་གཙོ་སྤྱི་འཐུས་ཟླ་བ་ཚེ་རིང་ལགས་ནས། ཤར་ནུབ་རྒྱལ་ཁབ་ཁག་འདྲ་མིན་ནས་ཡོང་བའི་གཞོན་སྐྱེས་ཉུང་ཙམ་ཞིག་དང་། རྒྱ་གར་ནང་གི་བོད་རིགས་སློབ་ཕྲུག་མང་པོ་བསྡོམས་པའི་གཞོན་སྐྱེས་ ༣༥༠༠ ཡས་མས་འཛོམས་ཡོད་པ་འགྲེལ་བརྗོད་གནང་གི་འདུག
སློབ་ཕྲུག་བསྟན་འཛིན་ཆོས་འཛིན་ལགས་ནས། ༧གོང་ས་མཆོག་གིས་ལམ་སྟོན་ཕེབས་པ་བཞིན་བོད་མི་གཞོན་སྐྱེས་ཚོས་སོ་སོའི་སྐད་ཡིག་སློབ་གཉེར་བྱ་གལ་ཆེ་བའི་འབོད་སྐུལ་དང་ཆབས་ཅིག། ནང་ཆོས་ངོ་སྤྲོད་ལ་ཞུགས་རྒྱུའི་གོ་སྐབས་བྱུང་བར་ཧ་ཅང་དགའ་བོ་བྱུང་བ་འགྲེལ་བརྗོད་གནང་གི་འདུག
གཞན་ཡང་སློབ་ཕྲུག་ངག་དབང་ཀླུ་སྒྲུབ་ཚེ་རིང་ལགས་ནས། བོད་མིའི་སྤྱི་ཚོགས་ནི་ཆུང་ཆུང་དང་མི་འབོར་ཉུང་ཉུང་ཡིན་པས། རིམ་པས་ནང་ཆོས་ཉམས་ཆག་གི་ཉེན་ཁ་ཡོད་པར་བརྟེན། ནང་ཆོས་ངོ་སྤྲོད་འདི་འདྲ་ཧ་ཅང་གལ་ཆེན་དུ་མཐོང་གི་ཡོད་པ་འགྲེལ་བརྗོད་གནང་གི་འདུག
༧གོང་ས་མཆོག་གི་བཀའ་ཆོས་འདིར་མི་རིགས་སྣ་ཚོགས་ཀྱི་མི་མང་སྟོང་ཕྲག་མང་པོ་བཅར་གནང་ཡོད་པ་མ་ཟད། ལྷག་པར་སློབ་ཕྲུག་ཚོ་མང་པོ་ཡོད་པར་ཆེད་དམིགས། རྣམ་རྒྱལ་གྲྭ་ཚང་གི་མཁན་པོ་ཁྲོམ་ཐོག་རིན་པོ་ཆེ་མཆོག་དང་སྐུ་སྒེར་དྲུང་ཆེ་ཡང་སྟེང་རིན་པོ་མཆོག་གཉིས་ནས། མུ་མཐུད་ནང་ཆོས་ངོ་སྤྲོད་ཀྱི་མཛད་རིམ་བསྐྱངས་ཡོད་པ་དང་། གསུང་ཆོས་ཉིན་གཉིས་པར་ཐུགས་རྗེ་ཆེན་པོའི་བཀའ་དབང་དངོས་གཞི་གནང་གཏན་ཁེལ་ཡོད་པ་རེད།

གསར་འགོད་པ། བློ་བྷེ།
རྩོམ་སྒྲིག་པ། ཡེ་ཤེས་ཟླ་བ།
དྲ་ཐོག་སྤེལ་མཁན། ཡེ་ཤེས་ཟླ་བ།