༧གོང་ས་མཆོག་ལ་དྭགས་ས་གནས་སུ་ཚེས་བཅུ་གཅིག་ཉིན་ཆིབས་བསྒྱུར་མཛད་རྒྱུ་རེད་འདུག
སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ལ་དྭགས་ས་གནས་སུ་ཕྱི་ཟླ་༧ཚེས་༡༡ཉིན་ཞབས་སོར་འཁོད་རྒྱུ་ཡིན་འདུག
- 2023-07-10
-
-
-
བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ལ་དྭགས་ས་གནས་སུ་ཆིབས་བསྒྱུར་ཆེད་ལྡི་ལིར་ཆིབས་བསྒྱུར་མཛད་ཡོད་པ་དང་། མཛད་འཆར་ལྟར་ཕྱི་ཟླ་༧པའི་ཚེས་༡༠ཉིན་ལ་དྭགས་ས་གནས་སུ་མཁའ་ལམ་བརྒྱུད་ཆིབས་བསྒྱུར་གནང་གཏན་འཁེལ་ཡོད་ན་ཡང་། ཚེས་༡༠ཉིན་ལ་དྭགས་ས་གནས་དང་རྒྱ་གར་གྱི་རྒྱལ་ས་ལྡི་ལིའི་གནམ་གཤིས་ཡག་པོ་མེད་པའི་རྐྱེན་གྱིས་གནམ་གྲུ་འཕུར་མ་ཐུབ་པར་བརྟེན། སང་ཉིན་ཕྱི་ཚེས་༡༡ཉིན་གྱི་སྔ་དྲོར་ལ་དྭགས་ས་གནས་སུ་ཞབས་སོར་འཁོད་རྒྱུ་ཡིན་པ་ལ་དྭགས་ནང་ཚོགས་ཀྱི་དབུ་སྐྱོང་ཐུབ་བསྟན་ཚེ་དབང་ལགས་ཀྱིས་ཨེ་ཤེ་ཡ་རང་དབང་རླུང་འཕྲིན་ཁང་གི་ས་གནས་གསར་འགོད་པར་ངོ་སྤྲོད་གནང་འདུག
ཁོང་གིས་གསུངས་ན། ༧གོང་ས་མཆོག་ལ་དྭགས་ས་གནས་སུ་ཆིབས་བསྒྱུར་མཛད་རྒྱུར་ལ་དྭགས་ས་གནས་གཞུང་དམངས་ཚང་མས་ཕེབས་བསུའི་གྲ་སྒྲིག་ཨང་གསར་བྱས་བསྡད་ཡོད་པ་དང་། ཕེབས་བསུར་ས་གནས་གང་ས་ནས་མི་མང་པོ་ཕེབས་ཡོད་པ་གསུངས་བྱུང་།
ཚེས་༩ཉིན་ཨ་རིའི་བོད་དོན་ཆེད་དམིགས་བསལ་འབྲེལ་མཐུད་པ་ལྕམ་(Uzra Zeya)་ལགས་ཀྱིས་སྣེ་ཁྲིད་འོག་ལྡི་ལིར་བཅའ་བཞུགས་ཨ་རིའི་གཞུང་ཚབ་ཆེན་མོ་དང་། ཨ་རིའི་རོགས་དངུལ་ཐེབས་རྩ་ཁང་གི་ཨེ་ཤེ་ཡའི་སྡེ་ཚན་གྱི་འགན་འཛིན་སོགས་ཡོད་པའི་སྐུ་ཚབ་ཚོགས་ཆུང་ཞིག་གིས། རྒྱ་གར་གྱི་རྒྱལ་ས་ལྡི་ལིར་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་དང་མཇལ་མོལ་གནང་ཡོད་པ་དང་། སྐབས་དེར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་ལགས་དང་། ཕྱི་དྲིལ་བཀའ་བློན་ནོར་འཛིན་སྒྲོལ་མ་ལགས། བྱང་ཨ་རིའི་སྐུ་ཚབ་དོན་གཅོད་རྣམ་རྒྱལ་ཆོས་གྲུབ་ལགས། ལྡི་ལི་དོན་གཅོད། རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་བསྟན་ཆོས་རྒྱ་མཚོ་ལགས་སོགས་མཉམ་ཞུགས་གནང་འདུག
གསར་འགོད་པ། འཕྲིན་ལས་ཆོས་སྒྲོན།
རྩོམ་སྒྲིག་པ། ཚེ་བརྟན་རྣམ་རྒྱལ།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།