བོད་ཀྱི་ཆོས་སྡེ་ཁག་གི་དགེ་རྒན་རྣམས་ལ་ཟབ་སྦྱོང་སྐབས་གནའ་དེང་གི་ཤེས་ཡོན་ཟུང་སྦྲེལ་སློབ་ཁྲིད་བྱ་ཐབས་གལ་ཆེར་འཛིན་གནང་དགོས་པ་གསུངས་འདུག

• 2024-08-08

ས་རཱ་བོད་ཀྱི་མཐོ་རིམ་སློབ་གཉེར་ཁང་དུ། ཕྱི་ཟླ་ ༨ ཚེས་ ༧ རེས་གཟའ་ལྷག་པའི་ཉིན་དབུས་བོད་མིའི་སྒྲིག་འཛུགས་ཀྱི་ཆོས་རིག་ལས་ཁུངས་ཀྱིས་བོད་ཀྱི་ཆོས་སྡེ་ཆེ་ཁག་གི་དགེ་རྒན་རྣམས་ལ་གཞི་རིམ་སློབ་ཁྲིད་གནང་སྟངས་སྐོར་གྱི་ཟབ་སྦྱོང་ཐེངས་གཉིས་པ་དེ་བཞིན་འགོ་འཛུགས་གནང་ཡོད་པ་དང་། ཟབ་སྦྱོང་དེ་བཞིན་ཟླ་ ༩ ཚེས་ ༢༠ བར། ཉིན་གྲྭངས་ ༤༠ རིང་གནང་གི་ཡོད་པ་རེད།
ཟབ་སྦྱོང་ནང་རྒྱ་གར་ལྷོ་ཕྱོགས་དང་། རྡ་རམ་ས་ལ་བཅས་སུ་ཡོད་པའི་བོད་ཀྱི་དགོན་སྡེ་ཁག་ ༡༡ ནས་ཕེབས་པའི་དགེ་རྒན་ ༡༦ མཉམ་ཞུགས་གནང་ཡོད་པ་དང་། ཁོང་རྣམ་པ་ཚོར་བོད་ཀྱི་སྐད་ཡིག་སློབ་ཁྲིད་ཀྱི་ལམ་སྟོན་དང་། སློབ་གསོ་རིག་པ། ཕྲུ་གུའི་སེམས་ཁམས་ཤེས་ཡོན། སིའི་ཤེས་ཡོན། རྩོམ་རིག་དང་རྩོམ་རིག་གི་སློབ་ཁྲིད་ཐབས་ལམ་བཅས་ཀྱི་སྐོར་ལ་སྦྱོང་བརྡར་གནང་རྒྱུ་ཡིན་འདུག
ཆོས་རིག་དྲུང་ཆེ་བདུད་འདུལ་རྡོ་རྗེ་ལགས་ཀྱིས་དགོན་པ་ཁག་ནང་སྲོལ་རྒྱུན་གྱི་སློབ་ཁྲིད་གནང་ཕྱོགས་དང་དེང་དུས་ཀྱི་སློབ་ཁྲིད་ཐབས་ལམ་གཉིས་ཟུང་འབྲེལ་གྱིས་བེད་སྤྱོད་གནང་གལ་ཆེན་པོ་ཡིན་པའི་སྐོར་གསུང་བཤད་གནང་འདུག
ཟབ་སྦྱོང་འདི་བཞིན་དགོན་སྡེ་ཁག་གི་དགེ་རྒན་རྣམས་ལ་དེང་དུས་སློབ་ཁྲིད་གནང་སྟངས་ཀྱི་ཟབ་སྦྱོང་ཐོག་མ་ཆགས་ཀྱི་ཡོད་པ་དབུས་བོད་མིའི་སྒྲིག་འཛུགས་ཀྱིས་གནས་ཚུལ་སྤེལ་འདུག

གསར་འགོད་པ། སྒྲོལ་མ་ལྷ་མོ།
རྩོམ་སྒྲིག་པ། དོན་གྲུབ་རྣམ་རྒྱལ།
དྲྭ་ཐོག་རྩོམ་སྒྲིག་པ། བཀྲ་ཤིས་དབང་ཕྱུག
དྲྭ་ཐོག་སྤེལ་མཁན། ཀླུ་འབུམ།