བོད་ནང་གི་འགྲོ་བ་མིའི་ཐོབ་ཐང་ལ་བརྩི་མེད་རྡོག་རོལ་གཏོང་བཞིན་པའི་ཐད་སྣང་ཆུང་བྱེད་རྒྱུ་མེད་པའི་ཞུ་འབོད།

• 2023-04-04

ཉེ་བའི་ཆར་ཨའོསི་ཊརེ་ལི་ཡ་དང་རྒྱ་ནག་དབར་གྱི་ཚོང་དོན་འབྲེལ་ལམ་སླར་གསོ་བྱེད་བཞིན་ཡོད་པ་དང་དུས་མཚུངས་ཨའོསི་ཊརེ་ལི་ཡའི་སྲིད་དོན་མི་སྣ་མི་ཉུང་བ་ཞིག་གིས་རྒྱ་ནག་དང་འབྲེལ་ལམ་སླར་གསོ་ཡོང་རྒྱུར་འབོད་བརྩོན་བྱེད་བཞིན་པ་དང་། གཟའ་འཁོར་འདིའི་ནང་ཨའོསི་ཊརེ་ལི་ཡའི་ཚོང་དོན་བློན་ཆེན་ལས་རོགས་ Tim Ayres རྒྱ་ནག་ནང་དུ་རྒྱ་ནག་གཞུང་གིས་གཉེར་བའི་ཚོང་དོན་གླེང་སྟེགས་ལྷན་ཚོགས་ཐོག་མཉམ་ཞུགས་གནང་གི་ཡོད་པ་མ་ཟད།   རིང་མིན་ཚོང་དོན་བློན་ཆེན་དང་ཡུལ་སྐོར་སྤྲོ་འཆམ་ལས་ཁང་གི་བློན་ཆེན་Don Farrell ཡང་རྒྱ་ནག་ནང་ཕེབས་འཆར་ཡོད་པ་རེད།   དེར་བརྟེན་ཨའོསི་ཊརེ་ལི་ཡའི་བོད་དོན་རྒྱབ་སྐྱོར་ཚོགས་པའི་ངོས་ནས་ཨའོསི་ཊརེ་ལི་ཡའི་དཔོན་རིགས་ཀྱིས་རྒྱ་ནག་དང་ཚོང་དོན་སོགས་ཀྱི་གྲོས་མོལ་བྱེད་པའི་སྐབས་རྒྱ་ནག་གི་འགྲོ་བ་མིའི་ཐོབ་ཐང་གནས་སྟངས་སྐོར་ངེས་པར་དུ་གླེང་སློང་གནང་དགོས་པའི་ཁར།   གླེང་སློང་བྱེད་པའི་སྐབས།  ཨའོསི་ཊརེ་ལི་ཡས་ཕྱི་ལོ་༢༠༢༡ལོར་ཁྲིམས་ལུགས་ལ་བསྒྱུར་བཅོས་བྱས་པའི་ནང་དོན་བཞིན་རྒྱ་ནག་དམར་ཤོག་གཞུང་གི་དཔོན་རིགས་སུ་འདྲ་ཞིག་ཡིན་རུང་འགྲོ་བ་མིའི་ཐོབ་ཐང་ལ་བརྩི་མེད་རྡོག་རོལ་གྱི་བྱ་སྤྱོད་སྤེལ་ཚེ་དཔོན་རིགས་དེས་ངེས་པར་འགན་འཁུར་དགོས་པ་དང་།   དེ་ཡང་དུས་ཚོད་ངེས་ཅན་ཞིག་ནང་འབྲས་བུ་ཐོན་ཐུབ་པ་ཞིག་བྱ་དགོས་པ་མ་ཟད།  འགྲོ་བ་མིའི་ཐོབ་ཐང་ཐད་ཀྱི་གྲོས་མོལ་དེ་ཡང་དམིགས་ཡུལ་དང་གྲུབ་འབྲས་གཉིས་ཀ་ལྡན་དགོས་པ།   དེ་བཞིན་ ཨའོསི་ཊརེ་ལི་ཡའི་མི་མང་ཚོར་འགན་ལེན་གྱིས་ཨའོསི་ཊརེ་ལི་ཡའི་འདུ་ཤེས་འཛིན་སྟངས་ལ་སྲུང་སྐྱོབ་དགོས་པའི་ཆ་རྐྱེན་འོག་གྲོས་མོལ་གནང་རྒྱུ་དེ་གལ་འགངས་ཆེན་པོ་ཡིན་པ་སོགས་ཨའོསི་ཊརེ་ལི་ཡའི་བོད་དོན་རྒྱབ་སྐྱོར་ཚོགས་པས་ཨའོསི་ཊརེ་ལི་ཡའི་དཔོན་རིགས་ཚོར་འབོད་སྐུལ་གནང་ཡོད་ཅིང་།  བོད་དོན་ལ་དོ་འཁུར་ཅན་ཚོས་ཞུ་སྙན་འདིར་རྒྱབ་སྐྱོར་གྱི་ས་རྟགས་འགོད་དགོས་པའི་སྐུལ་མ་གནང་བཞིན་འདུག  །

གསར་འགོད་པ། འཆི་མེད།

རྩོམ་སྒྲིག་པ། བཀྲིས་དབང་ཕྱུག

དྲ་ཐོག་སྤེལ་མཁན། པ་སངས་དོན་ལྡན།