རྒྱ་གར་ཤར་ཕྱོགས་བོད་མིའི་ས་གནས་ཁྲིམས་ཞིབ་ཁང་།

• 
  2013-01-15

དེ་ཡང་ས་གནས་ནས་འདི་གའི་གསར་འགོད་པས་གནས་ཚུལ་བཏང་དོན། ཚེས་ ༡༤ ཉིན་རྒྱ་གར་བྱང་ཤར་ཕྱོགས་ཀྱི་བོད་མིའི་ས་གནས་ཁྲིམས་ཞིབ་ཁང་དབུ་འབྱེད་ཀྱི་མཛད་སྒོའི་སྐུ་མགྲོན་གཙོ་བོ་ལ། ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ངག་དབང་ཐུབ་བསྟན་ལགས་ཀྱི་དབུས། རྒྱ་གར་ཤར་ཕྱོགས་བོད་མིའི་ཁྲིམས་ཞིབ་ཁང་གི་ཁྱབ་ཁོངས་ས་གནས་མན་འབར་དང་། རྡོར་གླིང། ཨོ་རི་ས། ཀ་སྦུག སྒང་ཏོག རང་དབང་ལ། སོན་ན་ཌ། འབུམ་སྡེ་ལ། བསྟན་འཛིན་སྒང། ཏེ་ཛུ། མེའོ། ཤི་ལོང་སོགས་གཞིས་སྒར་ཁག་གི་ས་གནས་འགོ་འཛིན་རྣམ་པས་གཙོས་ས་གནས་ཁྲིམས་ཞིབ་པ་དང་། ཁྲིམས་དྲུང་རྣམ་པ་བཅས་ཕེབས་ཡོད་པ་དང༌། སྐབས་དེར་སྐུ་མགྲོན་གཙོ་བོ་ཁྲིམས་ཞིབ་པ་ངག་དབང་ཐུབ་བསྟན་ལགས་ཀྱིས་གསུང་དོན། སྤྱིར་བཏང་འཛམ་གླིང་འདིའི་ནང་རྒྱལ་ཁབ་ཁག་མང་དག་ཅིག་ཡོད་པ་མ་ཟད། དེ་ཚོའི་ནང་གཞུང་འཛིན་ལམ་ལུགས་མི་འདྲ་བ་མང་པོ་ཡོད་པ་དཔེར་ན། རྒྱལ་པོའི་གཞུང་དང་དྲག་པོའི་གཞུང། དེ་བཞིན་དམར་པོའི་གཞུང་དང་མང་གཙོའི་གཞུང་བཅས་ཡོད། འོན་ཀྱང་གཞུང་འཛིན་ལམ་ལུགས་དེ་དག་ནང་ནས་མང་གཙོའི་གཞུང་དེ་ཡག་ཤོས་བརྩི་བཞིན་ཡོད། དེའི་རྒྱུ་མཚན་གཙོ་བོ་ནི་རྒྱལ་ཁབ་དང་། རྒྱལ་ཁབ་ཀྱི་ཁྲིམས་དང་ལམ་ལུགས་བཟོ་རྒྱུའི་དབང་ཆ་མི་མང་ལ་ཡོད། དེར་བརྟེན་མི་མང་པོ་ཞིག་གིས་རྒྱལ་པོའི་གཞུང་མི་དགོས་ཞེས་ངོ་རྒོལ་བྱེད་བཞིན་ཡོད། དེ་བཞིན་འཛམ་གླིང་ནང་སྐྱབས་བཅོལ་བ་རབ་དང་རིམ་པ་ཡོད་པའི་ནང་ནས་ང་ཚོ་བོད་པ་ཚོ་༸གོང་ས་མཆོག་གི་ལམ་སྟོན་བཀའ་སློབ་དང་། ཐུགས་རྗེ་བཀའ་དྲིན་ལ་བརྟེན་ནས་སྐྱབས་བཅོལ་བ་འདྲ་འདྲའི་ནང་ནས་མི་འདྲ་བ་ཆགས་ཡོད། དེར་བརྟེན་ང་ཚོ་བོད་པ་ཚོས་༸གོང་ས་༸སྐྱབས་མགོན་ཆེན་པོ་མཆོག་གིས་གསོལ་རས་བསྩལ་གནང་བའི་ཡང་དག་པའི་མང་གཙོ་འདི་ལག་ལེན་ཚུལ་བཞིན་བསྟར་ཐུབ་པ་བྱེད་དགོས་བ་སོགས་བརྗོད་འདུག