༧གོང་ས་མཆོག་གིས་བོད་མིར་བཀའ་སློབ།

• 
  2015-10-01

༄༅།བོད་ཀྱི་བླ་ན་མེད་པའི་དབུ་འཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་ཁ་ས་ཕྱི་ཟླ་ ༩ པའི་ཚེས་ ༣༠ ཉིན་ཨ་རིའི་མངའ་སྡེ་མི་ནི་སོ་ཌའི་ནང་གནས་སྡོད་བོད་མི་རྣམས་ལ་མཇལ་ཁ་དང་བཀའ་སློབ་སྩལ་སྐབས། མགོན་པོ་གང་ཉིད་སྐུ་གཟུགས་གསལ་ཐང་ཡིན་པར། ཁྱེད་རང་ཚོ་བློ་བདེ་པོ་བྱས་ནས་སྡོད་ཅེས་གསུངས་འདུག  དེ་ཡང་༧གོང་ས་༧སྐྱབས་མགོན་ཆེན་པོ་མཆོག་  ཨ་རིའི་མངའ་སྡེ་མི་ནི་སོ་ཌའི་གྲོང་ཁྱེར་རོ་ཅེས་ཀྲར་གྱི་མ་ཡོ་སྨན་ཁང་དུ་༧སྐུའི་འཕྲོད་བཞེས་བརྟག་དཔྱད་ཆེད་ཆིབས་སྒྱུར་བསྐྱངས་པ་དང་བསྟུན། ཁུལ་དེར་གནས་སྡོད་བོད་རིགས་སྤྱི་མཐུན་ཚོགས་པས་ཇི་ལྟར་གསོལ་འདེབས་ཞུས་པ་བཞིན། ས་གནས་དང་ཉེ་འཁོར་མངའ་སྡེ་ཁག་ནས་བཅར་བའི་བོད་མི་རྣམས་ལ་གོང་ཚེས་ཉིན་བཀའ་སློབ་སྩལ་བའི་ནང༌། ཁྱེད་རང་ཚོ་ཚང་མས་ཤེས་གསལ་རེད། ངོས་ཀྱིས་མ་ཡོ་སྨན་ཁང་ནང་བརྟག་དཔྱད་བྱས་ཏེ་ལོ་བཅུ་གྲངས་ཕྱིན་ཡོད། ཧ་ལམ་ལོ་རྟག་འཆར་འདིར་ཡོང་གི་ཡོད། མ་གཞི་ཟླ་བ་དྲུག་རེའི་མཚམས་ལ་ལྡི་ལིར་བརྟག་དཔྱད་རེ་བྱེད་རྒྱུ་དང་། དེ་ནས་ཟླ་བ་དྲུག་གི་རྗེས་འདིར་ཚུར་ཡོང་སྟེ་བརྟག་དཔྱད་བྱེད་བཞིན་ཡོད། ཐེངས་འདིར་འདི་གར་བརྟག་དཔྱད་ཆེད་ཡོང་བ་ཡིན། ཁ་སྔོན་རྒྱ་གར་དུ་བརྟག་དཔྱད་བྱེད་སྐབས་གཟུགས་པོ་ཧ་ཅང་ཡག་པོ་འདུག ནད་གཞི་རིགས་གང་ཡང་མི་འདུག་ཅེས་བརྗོད་བྱུང་། ད་རེས་ཡང་འདི་གར་བརྟག་ཞིབ་བྱས་རྗེས་གཟུགས་པོའི་གནས་སྟངས་རྩ་བའི་ཆ་ནས་ཧ་ཅང་ཡག་པོ་འདུག ཅེས་བརྗོད་ཀྱི་འདུག་པས་ཁྱེད་རང་ཚོ་བློ་བདེ་པོ་བྱས་ནས་སྡོད་ཅེས་དང༌།
ཡང་༧གོང་ས་མཆོག་གིས།  ད་ལོའི་ལོ་མཇུག་ལ་དུས་འཁོར་དབང་ཆེན་བྱེད་རྒྱུའི་ཐོག་མའི་འཆར་གཞི་དེ་མི་དགོས་པ་བྱས་པ་རེད། དེའི་སྔོན་ལ་སོག་ཡུལ་ལ་དུས་འཁོར་དབང་ཆེན་བྱེད་རྒྱུའི་རེ་འདུན་ཞུས་པ་རེད། དེ་ཡང་མ་དགོས་པ་བྱས་པ་རེད། དེ་མིན་གྱི་འདི་གར་ཆོས་འབྲེལ་བྱེད་རྒྱུ་ཁ་ཤས་ཡོད་པ་དེ་དག་བསྡུས་པ་བཟོས་ཡོད། ཕྱི་ཟླ་ ༡༢
ནང་རྒྱ་གར་ལྷོ་ཕྱོགས་སུ་ལོ་གཉིས་ཙམ་ཕྱིན་པའི་ལམ་རིམ་འཁྲིད་ཆེན་བཅོ་བརྒྱད་ཀྱི་མཇུག་དེ་ལྷོད་ལྷོད་ངང་སྐྱེལ་དགོས་བསམས་དྲན་བྱུང་ཞེས་ད་ནས་བཟུང་ཆིབས་བསྒྱུར་དང་མཛད་འཕྲིན་ཁག་ཉུང་དུ་གཏོང་རྒྱུའི་དགོངས་བཞེས་གནང་རྒྱུ་ཡིན་པའི་བཀའ་སྩལ་གནང་མཛད་ཡོད་པ་རེད།།  གསར་འགོད་པ་ངག་དབང་ཆོས་འཕེལ།