ལྷ་སྤྱི་ཚོགས་ཞབས་ཞུ་དང་ཤེས་ཡོན་ལྟེ་གནས་ཁང་དབུ་བརྙེས་ནས་ལོ་ངོ་ཉི་ཤུ་འཁོར་བའི་རྟེན་འབྲེལ་མཛད་སྒོ།

• 
  2017-11-12

ཕྱི་ཟླ་༡༡ཚེས་༡༡་ཉིན་བཞུགས་སྒར་དྷ་རམ་ས་ལའི་བོད་ཀྱི་ཟློས་གར་ཚོགས་ཁང་དུ་ལྷ་སྤྱི་ཚོགས་ཞབས་ཞུ་དང་ཤེས་ཡོན་ལྟེ་གནས་ཁང་དབུ་བརྙེས་ནས་ལོ་ངོ་ ༢༠ འཁོར་བའི་མཛད་སྒོ་སྐོངས་ཚོགས་གནང་ཡོད་པ་དང་། མཛད་སྒོའི་ཐོག་སྐུ་མགྲོན་གཙོ་བོར་བོད་མི་མང་སྤྱི་འཐུས་ཚོགས་གཙོ་མཆོག་དང་། དམིགས་བསལ་སྐུ་མགྲོན་དུ་བོད་མིའི་སྒྲིག་འཛུགས་ཀྱི་ཁྲིམས་ཞིབ་པ་ངག་དབང་རབ་རྒྱས་ལགས་ཀྱི་གཙོས་དགའ་ལྡན་ཕོ་བྲང་གི་དྲུང་ཆེ་དང་། དྷ་སའི་གཞུང་འབྲེལ་མིན་པའི་ཚོགས་སྐྱིད་ཁག་གི་འགན་འཛིན་དང་སྐུ་ཚབ་སོགས་ཁྱོན་མི་གྲངས་ ༣༠༠ ལྷག་འདུ་འཛོམས་བྱུང་ཡོད་པ་རེད། མཛད་སྒོའི་ཐོག་མར་ལྷ་སྤྱི་ཚོགས་ཞབས་ཞུ་དང་ཤེས་ཡོན་ལྟེ་གནས་ཁང་གི་འགན་འཛིན་ངག་དབང་རབ་རྒྱས་ལགས་ཀྱིས་ལྷ་སྤྱི་ཚོགས་ཞབས་ཞུ་དང་། ཤེས་ཡོན་ལྟེ་གནས་ཁང་གི་མི་ལོ་ ༢༠ ཤུའི་རིང་གི་ལས་བསྡོམས་མདོར་བསྡུས་སྙན་ཐོ་སྙན་སྒྲོན་གནང་བའི་ནང་ལྷ་སྤྱི་ཚོགས་ཞབས་ཞུ་ཁང་ནི་ཕྱི་ལོ་༡༩༩༧ ལོར་ཐོག་མར་ཨ་རིའི་མངའ་སྡེ་Louisiana འགོ་འཛུགས་ཀྱིས་Louisiana ཧི་མ་ལ་ཡའི་ཚོགས་པ་ཞེས་མིང་བཏགས་ཡོད་པ་དང་། ཕྱི་ལོ་༡༩༩༨ ལོར་བོད་མི་བྱམས་པ་ཚེ་རིང་ལགས་དང་ཨ་རི་བ་ནེལ་གྷུ་ཌུ་རེ་ལགས་རྣམ་གཉིས་ཀྱི་གཙོས་བོད་ནས་གསར་དུ་ཕེབས་མཁན་གཞོན་སྐྱེས་འགའ་རེ་མཉམ་འབྲེལ་གྱིས་རྒྱ་གར་ནང་བཙུགས་ཏེ་དབྱིན་ཡིག་གི་ཚོགས་མིང་བསྡུས་ཏེ་བོད་ཡིག་ནང་ལྷ་ཞེས་སྒྲ་བསྒྱུར་གནང་བ་ཞིག་ཡིན་པ་རེད་ཅེས་དང་  འདས་པའི་ལོ་ངོ་༢༠ ཡི་རིང་ཞབས་ཞུ་ཁང་འདི་ནས་ཁྱོན་སློབ་མ་ ༡༡༤༢༢ ལ་སྐད་ཡིག་འདྲ་མིན་གྱི་འཛིན་གྲྭ་དང་།  སློབ་མ་༢༩༥༥ ལ་གློག་ཀླད་འཛིན་གྲྭ་  ཕྱི་རྒྱལ་ཤེས་ཡོན་ལྟེ་གནས་ཁང་ཁག་ནས་ཕེབས་པའི་སློབ་མ་༡༢༥༨༡ ལ་རིག་གཞུང་བརྗེ་ལེན་གྱི་གོ་སྐབས་བསྐྲུན་གནང་ཡོད་པ་རེད།   གཞན་ཡང་དྷ་ས་ཁུལ་གྱི་ཁོར་ཡུག་གཙང་བཟོ་དང་། བསྐུ་མཉེ་དང་པར་ལེན་སྦྱོང་བརྡར།  སློབ་གྲྭ་དང་རྒན་གསོ་ཁང་། སྨན་ཁང་བཅས་ལ་འཐུང་ཆུ་གཙང་བཟོའི་འཕྲུལ་ཆས་རིན་མེད་དུ་གནང་བ་དང་། ཡུལ་མི་ཉམ་ཐག་ལ་གྱོན་གོས་སྦྱིན་གཏོང་གནང་བ།  དེ་བཞིན་དྷ་སའི་དགོས་མཁོ་ཅན་གྱི་མི་གྲངས་༥༠ ནས་༦༠ ཙམ་ལ་ཉིན་ལྟར་གུང་ཚིགས་འབུལ་གྱི་ཡོད་པ་སོགས་སྤྱི་ཚོགས་ཞབས་ཞུའི་རྣམ་གྲངས་ ༢༠ ལྷག་སྒྲུབ་གནང་གི་ཡོད་པ་རེད།  ལྷ་སྤྱི་ཚོགས་ཞབས་ཞུ་དང་ཤེས་ཡོན་ལྟེ་གནས་ཁང་བཙུགས་ནས་མི་ལོ་ ༢༠ འཁོར་བའི་རྟེན་འབྲེལ་མཛད་སྒོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གསུང་འཕྲིན་ཞིག་བསྩལ་བའི་ནང་འདི་ལོར་ལྷ་སྤྱི་ཚོགས་ཞབས་ཞུ་དང་ཤེས་ཡོན་ལྟེ་གནས་ཁང་ ༢༠ འཁོར་བའི་དུས་སྟོན་བྱ་རྒྱུ་ཡིན་པ་ཤེས་རྟོགས་བྱུང་བས་ངོས་རང་དགའ་པོ་བྱུང་། ཕྱི་ལོ་ ༡༩༥༩ ལོར་ང་ཚོ་རྒྱ་གར་ལ་སྐྱབས་བཅོལ་དུ་ཐོག་མར་འབྱོར་སྐབས་བོད་པའི་བཤད་སྲོལ་ལྟར་སྒང་ལ་གནམ་དང་འོག་ལ་ས་ལས་ངོ་ཤེས་པ་མེད། དེའི་རྗེས་ཀྱི་ལོ་བཅུ་ཕྲག་ཁ་ཤས་ནང་བོད་པའི་སྤྱི་ཚོགས་ཀྱི་དཔལ་འབྱོར་ཡར་རྒྱས་དང་། ན་གཞོན་རྣམས་ལ་ཤེས་ཡོན་སློབ་སྦྱོང་སྤྲོད་རྒྱུ་སོགས་མང་པོ་ཞིག་གཏོང་ཕོད་ཅན་གྱི་མི་སྒེར་དང་། ཚོགས་སྡེ་སྒྲིག་འཛུགས། གཞུང་སོགས་ལ་བརྟེན་དགོས་བྱུང་ཡོད་ཞེས་དང་། དེང་སྐབས་ལྷ་ནི་བོད་པའི་སྤྱི་ཚོགས་ནང་རྒན་གཞོན་གཉིས་ཀར་ཞབས་ཞུ་སྒྲུབ་མཁན་གྱི་གཞུང་འབྲེལ་མིན་པའི་ཚོགས་པ་གལ་ཆེན་ཞིག་ཆགས་འདུག ཚོགས་པ་འདི་ནི་འཆར་འགོད་ལེགས་ཤིང་ཚོགས་པའི་ལས་གཞི་ཁག་ལག་བསྟར་གང་ལེགས་དང་། སྣ་མང་ལས་གཞི་དེ་དག་གི་དམིགས་ཡུལ་ནི་བོད་ཀྱི་རིག་གཞུང་དང་། སྐད་ཡིག་སོགས་སྲུང་སྐྱོབ་གོང་འཕེལ། སྤྱི་ཚོགས་ནང་ཤེས་ཡོན་སློབ་གསོའི་ཐབས་ལམ་མཁོ་སྤྲོད། དེར་མ་ཟད་ཚོགས་པའི་རིག་གཞུང་བརྗེ་རེས་ཀྱི་ལས་གཞི་དང་། དྲྭ་ཚིགས་དང་སྤྱི་ཚོགས་དྲ་གནས། འཛམ་གླིང་གི་ས་ཕྱོགས་གང་ས་ནས་ཕེབས་པའི་དྭང་བླངས་པ་རྣམས་ལ་ཞབས་ཞུའི་གོ་སྐབས་འབུལ་བ་དང་། དངོས་ཡོད་ཀྱི་རོགས་རམ་བྱེད་ཐུབ་པ་བརྒྱུད་བོད་ཀྱི་གནས་དོན་དང་བོད་མིའི་སྐོར་གོ་རྟོགས་ཁྱབ་སྤེལ་གཏོང་གི་འདུག ཅེས་སོགས་བཀའ་གནང་འདུག་ཡོད་པ་སོགས་ཀྱི་གནས་ཚུལ་ཐོན་འདུག།
གསར་འགོད་པ་དབྱངས་སྒྲོལ།