ວຽດນາມສົນໃຈລົງທຶນ ຢູ່ເຂດດ່ານພູເກືອ

• ມະນີຈັນ
  2012-03-20

ຕາມຄໍາເວົ້າ ຂອງ ເຈົ້າໜ້າທີ່ ກ່ຽວຂ້ອງ ທ່ານນຶ່ງ ກ່າວວ່າ:

"ສ່ວນຫລາຍ ວຽດນາມ ນັກລົງທຶນ ຂອງ ວຽດນາມ ສເນີຈໍານົງ ຫລາຍຫມ້ອງ ຢູ່ພູເກືອ ເຂົາສິເຮັດ ເປັນເຂດ ເສຖກິດ ເປັນເຂດ ສາມຫລ່ຽມ ເຂດຂຍາຍ ເສຖກິດ ຄົບວົງຈອນ ຢູ່ຫັ້ນເລີຍ".

ທາງຜແນກ ແຜນການ ແລະ ການລົງທຶນ ແຂວງ ອັຕຕະປື ກໍຢືນຢັນວ່າ ມີນັກລົງທຶນ ຈາກ ບໍຣິສັດ ໃຫຍ່ ຂອງວຽດນາມ ຫລາຍ ບໍຣິສັດ ໃຫ້ຄວາມສົນໃຈ ເຂົ້າມາລົງທຶນ ຢູ່ໂຄງການ ເຂດດ່ານ ພູເກືອ ຖ້າຫາກເປັນ ແນວນັ້ນແທ້ ກໍເປັນໄປໄດ້ວ່າ ທາງການລາວ ຈະໃຫ້ ນັກລົງທຶນ ວຽດນາມ ເປັນຜູ້ໄດ້ຮັບ ສັມປະທານ ໂຄງການນັ້ນ ໃນ ອະນາຄົດ. ດັ່ງເຈົ້າໜ້າທີ່ ຜແນກແຜນການ ແລະ ການລົງທຶນ ທ່ານນຶ່ງ ກ່າວວ່າ:

"ປະເທດວຽດນາມ ຂະເຈົ້າຈັດເປັນ ບຸລິມະສິດ ພິເສດ ສໍາລັບ ປະເທດລາວເຮົາ ຜູ້ໃດມາ ລົງທຶນ ແລ້ວຜູ້ນັ້ນແຫລະ ຈະມີສິດ ສັມປະທານ".

ແຜນການ ສ້າງເຂດ ດ່ານພູເກືອ ກໍາລັງ ຢູ່ໃນຂັ້ນຕອນ ພິຈາຣະນາ ຂອງ ຣັຖບານລາວ ແລະ ຍັງບໍ່ໄດ້ຮັບ ອະນຸມັດ ໃຫ້ສ້າງເທື່ອ ແຕ່ກໍມີ ນັກລົງທຶນ ວຽດນາມ ທີ່ໃຫ້ຄວາມ ສົນໃຈ ເດີນທາງເຂົ້າ ມາເບິ່ງ ສະຖານທີ່ ບໍ່ໄດ້ຂາດ ແລະ ດຽວນີ້ ການເດີນທາງ ກໍສະດວກ ບໍ່ໃຊ້ເວລາດົນ.