ຄຸນງາມຄວາມດີຂອງ ອະດີດທ່ານນາຍພົນ ວັງປາວ

• ຈໍາປາທອງ
  2011-01-10

ອະດີດ ທ່ານນາຍພົນ ວັງປາວ ເປັນນາຍທະຫານ ລາວເຜົ່າມົ້ງ ຄົນທຳອິດ ທີ່ໄດ້ຊັ້ນ ນາຍພົນ ໃນກອງທັບແຫ່ງ ພຣະຣາຊອານາຈັກລາວ; ເປັນນາຍທະຫານ ທີ່ຈົງຮັກພັກດີ ຕໍ່ສິດ ແລະຜົນ ປະໂຫຍດ ອັນຊອບທັມ ຂອງ ປະເທດຊາດ ແລະ ປະຊາຊົນລາວ; ເປັນນາຍທະຫານ ທີ່ອົງອາດ ກ້າຫານ ແລະ ເສັຍສະລະຕໍ່ສູ້ ຕ້ານການຮຸກຮານ ຂອງພວກ ຄອມມິວນິສ ຕລອດໄລຍະ ສົງຄາມວຽດນາມ ຈົນຝ່າຍ ຄອມມິວນິສ ຖືທ່ານເປັນ ສັດຕຣູ ທີ່ໜ້າເກງກົວ ທີ່ສຸດຜູ້ນຶ່ງ ແລະ ກ່າວປະນາມ ຕ່າງໆນາໆ ຮວມທັງວ່າ ທໍຣະຍົດ ຕໍ່ຊາດ.

ມີຂ່າວວ່າ ຣັຖບານລາວ ໃນຊຸດ ປັດຈຸບັນ ບັນທຶກເອົາໄວ້ວ່າ ກອງທັບ ຂອງນາຍພົນ ວັງປາວ ໄດ້ເຮັດໃຫ້ “ບັ້ນຮົບທົ່ງໄຫຫີນ“ ແຂວງຊຽງຂວາງ ກາຍເປັນ 1 ໃນ 3 ຂອງ ບັ້ນຮົບ ອັນດຸເດືອດ ທີ່ສຸດ, ຍ້ອນທາງການລາວ ຕີຣາຄາວ່າ ທົ່ງໄຫຫີນ ຊຽງຂວາງ ເປັນທີ່ ຕັ້ງທີ່ມີ ຍຸທສາດ ສຳຄັນທາງດ້ານ ການທະຫານ, ທີ່ຢູ່ໃກ້ກັບເຂດ ທີ່ໝັ້ນຂອງຕົນ ທີ່ສຸດ. ຫາກສາມາດ ຍຶດຄອງເຂດ ນັ້ນໄດ້ ກໍຈະສາມາດ ຄວບຄຸມ ບໍ່ພຽງແຕ່ທົ່ວ ຂົງເຂດອ້ອມແອ້ມ ເທົ່ານັ້ນ ແຕ່ຫາກຍັງກວມ ໄປເຖິງພາກໃຕ້ ຂອງປະເທດຈີນ ນຳດ້ວຍ.

ພາຍຫລັງສົງຄາມ ນາຍພົນ ວັງປາວ ເປັນຜູ້ນຳ ພຽງຄົນດຽວ ຂອງລາວ ທີ່ສາມາດ ເຈຣະຈາ ກັບ ສະຫະຣັດ ສຳເຣັດ ເວົ້າສະເພາະ ໃນການນຳເອົາ ຊາວມົ້ງປະມານ 150,000 ຄົນ ໄປຕັ້ງຖິ່ນຖານ ທີ່ສະຫະຣັດ.

ນາຍພົນ ວັງປາວ ບໍ່ພຽງແຕ່ ຮັບໃຊ້ສິດ ແລະ ຜົນປະໂຫຍດ ຂອງຊາດ ແລະ ປະຊາຊົນລາວ ເທົ່ານັ້ນ ແຕ່ຫາກທັງ ຜົນປະໂຫຍດ ຂອງ ສະຫະຣັດ ອະເມຣິກາ ນຳດ້ວຍ ດັ່ງທ່ານ Dana Rohrabacher ສະມາຊິກ ຄົນສຳຄັນ ຂອງກັມມາທິການ ການຕ່າງປະເທດ ຂອງສະພາຕໍ່າ ສະຫະຣັດ ອາເມຣິກາ ກ່າວເມື່ອວັນສຸກ ທີ່ 7 ມົກກະຣາວ່າ “ ຂ້າພະເຈົ້າ ຍົກຍ້ອງ ແລະເຄົາຣົບ ນາຍພົນ ວັງປາວ ທີ່ໄດ້ເຄື່ອນໄຫວ ເພື່ອເສຣີພາບ ແລະ ເພື່ອຜົນປະໂຫຍດ ຂອງ ສະຫະຣັດ ອະເມຣິກາ “ແລະເອີ້ນນາຍພົນ ວັງປາວ ວ່າເປັນ“ ວິຣະບູຣຸດ “ ທີ່ໄດ້ຊ່ວຍເຫລືອ ສະຫະຣັດ ໃນປາງສົງຄາມ ວຽດນາມ.
ແລະ ທ່ານ ຊາລີ ວໍເຕີ ຜູ້ເປັນເພື່ອນ ສນິດຂອງທ່ານ ກ່າວວ່າ ນາຍພົນ ວັງປາວ ເປັນຜູ້ທີ່ມີ “ຜູ້ຄົນຮັກ ຫອມຫລາຍ ເທົ່າກັບເປັນພໍ່ ຂອງຊາວມົ້ງ ແລະ ຈະຖືກຈົດຈຳ ໄວ້ໃນຖານະ ນາຍພົນ ແລະ ນັກຮົບ ຜູ້ຍິ່ງໃຫຍ່.