ທັກສິນເຖິງວຽງຈັນ ພາດກັບກຸ່ມເສື້ອແດງ

• ມະນີຈັນ
  2012-04-12

ກຸ່ມຄົນເສື້ອແດງ ໄດ້ຖືກ ແນະນໍາ ບໍ່ໃຫ້ນຸ່ງ ເສື້ອແດງ ຕອນເຂົ້າມາລາວ ແຕ່ພາກັນ ປ່ຽນນຸ່ງເສື້ອ ສີແດງ ຫລັງຈາກ ເຂົ້າໄປສນາມບິນ ວັດໄຕ ແລ້ວ ພ້ອມທັງ ຊູປ້າຍ ຄໍາຂວັນ ຄອຍຖ້າ ຕ້ອນຮັບ. ກ່ຽວກັບ ເປົ້າໝາຍ ມາທ່ຽວລາວນັ້ນ ທ່ານ ທັກສິນ ຕອບຕໍ່ ນັກຂ່າວວ່າ:

"ທ່ານວ່າ ຢາກມາເຮັດບຸນ ແລະ ພົບພໍ້ກັບ ບັນດາ ພີ່ນ້ອງ ບໍ່ໄດ້ພໍ້ກັນ ມານານ ຫລາຍຄົນ ກໍບອກວ່າ ຢາກຈະພໍ້ ກໍເລີຍແວະມາ ບາງຄົນ ກໍເປັນຫ່ວງ ເຣື່ອງສຸຂພາບ ຂອງທ່ານ ເປັນແນວໃດ ເພາະມີການ ປ່ອຍຂ່າວ ຫລາຍ ແລ້ວກໍຢາກ ເຫັນໜ້າຕາ ນໍາດ້ວຍ".

ທ່ານ ຂວັນໄຊ ຫົວໜ້າກຸ່ມ ຮັກອຸດອນ ເວົ້າວ່າ ທາງການລາວ ໄດ້ປ່ຽນແຜນ ການເດີນທາງ ຂອງທ່ານ ທັກສິນ ໂດຍບໍ່ບອກ ໃຫ້ຮູ້ເລີຍ ແລະ ກໍປ່ຽນແປງ ທັງແຜນການ ເຄື່ອນໄຫວ ຂອງທ່ານ ໂດຍບໍ່ບອກ ໃຫ້ກຸ່ມຜູ້ ສນັບສນູນ ທີ່ຄອງຖ້າ ຕ້ອນຮັບ ທ່ານ ນັ້ນຮູ້ເລີຍ. ອັນນີ້ກໍເປັນ ທີ່ເຂົ້າໃຈດີ ເພາະໄດ້ມີ ຣາຍງານ ກ່ຽວກັບ ແຜນຕໍ່ຕ້ານ ທ່ານທັກສິນ ຊຶ່ງ ຣັຖບານລາວ ກໍຮັກສາ ຄວາມປອດພັຍ ເຂັ້ມງວດຂຶ້ນ.

ສ່ວນພິທີ ບາສີ ປີໃໝ່ ສໍາລັບ ທ່ານ ທັກສິນ ນັ້ນທ່ານ ຂວັນໄຊ ກໍວ່າບໍ່ຮູ້ ວ່າເພິ່ນໄປຈັດ ຢູ່ໃສ ຕາມແຜນເດີມ ກໍານົດຈັດຂຶ້ນ ມື້ຕໍ່ມາ ຢູ່ເຂດຮ້ານ ຊັພສິນຄ້າ ASEAN Mall ນະຄອນຫລວງ ວຽງຈັນ. ກ່ອນໜ້ານີ້ ທ່ານທັກສິນ ມີກໍານົດ ພົບປະກັບ ບັນດາ ນັກທຸຣະກິດ ລາວ ທີ່ໂຮງແຮມ ດອນຈັນ ເວລາບ່າຍ 1 ໂມງ 30 ນາທີ. ຫລັງຈາກນັ້ນ ກໍຈະຮ່ວມ ງານລ້ຽງ ອາຫານຄໍ່າ ຈັດຂຶ້ນ ໂດຍສະພາ ອຸດສາຫະກັມລາວ.

ທ່ານ ຂວັນໄຊ ວ່າ ຈະເປັນການ ດີຫລາຍ ຫາກທ່ານ ແລະ ຄົນອື່ນໆ ສາມາດເຫັນ ທ່ານ ທັກສິນ ກັບປະເທດ ຜ່ານສນາມບິນ ສຸວັນນະພູມ ທີ່ບາງກອກ.