ອົງການຕ້ານ ໂຣກເອສ ຂອງລາວ ແລະຫ້ອງການ ຕ້ານໂຣກເອສ ຂອງ ສະຫະປະຊາຊາດ ໄດ້ລົງສຳຣວດ ແລະເກັບກຳຂໍ້ມູນ ຜູ້ປ່ວຍໃນ 6 ແຂວງ ຂອງລາວ

• 
  2008-02-26

ອົງການຕ້ານໂຣກເອສ ຂອງລາວ ແລະຫ້ອງການ ຕ້ານໂຣກເອສ ຂອງສະຫະປະຊາຊາດ ໄດ້ລົງສຳຣວດ ແລະເກັບກຳ ຂໍ້ມູນຜູ້ປ່ວຍໃນ 6 ແຂວງ ຂອງລາວແລ້ວ ນັບຕັ້ງແຕ່ວັນທີ 1 ມົກະຣາ ເປັນຕົ້ນມາ ເພື່ອຢາກຊາບເຖິງ ຈຳນວນອັນແທ້ຈິງ ຂອງຜູ້ຕິດເຊື້ອໂຣກ HIV/AIDS.

ເຈົ້າໜ້າທີ່ກ່ຽວຂ້ອງກັບ ໂຄງການຕໍ່ຕ້ານໂຣກເອສ ຂອງລາວວ່າ ຫລັງຈາກຮູ້ຈັກຈຳນວນ ຜູ້ຕິດເຊື້ອໂຣກ HIV ແລ້ວທາງອົງການ ຈຶ່ງຈະສາມາດກຳນົດ ຈຳນວນຢາຕ້ານ ເຊື້ອໂຣກເອສ ARV ໃຫ້ຜູ້ປ່ວຍໄດ້ ດັ່ງທີ່ເຈົ້າໜ້າທີ່ລາວ ໄດ້ກ່າວ່າ:

(ສຽງ) "ປະຕິບັດລົງເກັບຂໍ້ມູນ ແມ່ນເດືອນ 1 ປີ 2008, ຈະເກັບຢູ່ 6 ແຂວງ, ນະຄອນຫລວງວຽງຈັນ ແຂວງວຽງຈັນ, ຈຳປາສັກ ຫລວງນ້ຳທາ ສວັນະເຂດ ບໍ່ແກ້ວ."

ອົງການທີ່ກ່ຽວຂ້ອງ ກັບການເຮັດວຽກວຽກ ຕ້ານໂຣກເອສ ໃນລາວກໍມີ ອົງການ Save the Children ຈາກ ປະເທດອັງກິດ, ອົງການຢູນີເຊັຟ, unaids, ສູນຕ້ານໂຣກເອສ ຂອງລາວ ຮ່ວມກັບກະຊວງ ສາທາຣະນະສຸກ.

ເຈົ້າໜ້າທີ່ລາວວ່າ ການສຳຣວດ ຫາຜູ້ຕິດເຊື້ອໂຣກ HIV ນີ້ໄດ້ຮັບຄວາມຍຸ່ງຍາກ ບາງປະການ ໂດຍສະເພາະ ຜູ້ຕິດເຊື້ອໂຣກ ບໍ່ກ້າເປີດເຜີຽວ່າ ຕົນຕິດເຊື້ອໂຣກ. ທາງການລາວ ວ່າ ຖ້າພົບເຫັນວ່າ ຈຳນວນຜູ້ຕິດເຊືອໂຣກ HIV ໃນແຂວງ ທີ່ທຳການສຳຣວດ ນີ້ມີຫລາຍ, ທາງສູນຕ້ານໂຣກເອສ ກໍຈະວາງແຜນ ເປີດສະຖານ ທີ່ແຈກຢາຍຢາຕ້ານ ໂຣກເອສ arv ຕື່ມອີກ

(ສຽງ) "ໃນປີ 2008 ຈະຂະຫຍາຍ ເພີ້ມສູນປິ່ນປົວດ້ວຍຢາ arv ອີກສອງສູນ ຄືຈຳປາສັກ ແລະຫລວງພະບາງ ເພື່ອໃຫ້ຄົນເຈັບ ຢູ່ທາງພາກເໜືອ ບໍ່ຕ້ອງເດີນທາງ ມາສວັນະເຂດ ຫລືພາກເໜືອ."

ເຈົ້າໜ້າທີ່ລາວວ່າ ການແຜ່ຂະຫຍາຍ ຂອງໂຣກເອສ ໃນລາວເພີ້ມຂື້ນ ຢູ່ທັງໃນຕົວເມືອງ ແລະໃນເຂດຊົນະບົດ ໂດຍສະເພາະ ໃນເຂດໂຄງການ ກໍ່ສ້າງໃຫ່ຽໆ ເຊັ່ນວ່າ ໂຄງການສ້າງຖນົນ ສາຍເໜືອ ຂອງລາວ, ໂຄງການຂຸດຄົ້ນຄຳ ແລະທອງ ແດງ ໃນເຂດພິເສດໄຊສົມບູນເປັນຕົ້ນ.

ຍິງສາວບໍ່ຣິການ ໂດຍມາກ ກໍໄປຈາກຕົວເມືອງ, ເມື່ອໄປຢູ່ໃນເຂດ ໂຄງການກໍ່ສ້າງ ແລ້ວກໍຊັກຊວນ ເອົານຸ່ມສາວ ຢູ່ໃນເຂດ ຊົນະບົດ ເຂົ້າຮ່ວມຂະບວນ ການຄ້າປະເວນີນຳ. ຍິງສາວນຸ່ມນ້ອຍ ໃນເຂດຊົນະບົດ ຕົກເປັນຜູ້ສ່ຽງສູງ ຕໍ່ການຕິດເຊື້ອໂຣກ hiv ຍ້ອນວ່າ ຂາດຄວາມເຂົ້າໃຈ ດ້ານການປ້ອງກັນເຊື້ອໂຣກ.

ສົມເນ ຣາຍງານ