ທະຫານໄທ ເຣີ້ມສົ່ງ ຊາວລາວເຜົ່າມົ້ງ ທີ່ຍັງເຫລືອ
ທາງການໄທ ໄດ້ສົ່ງ ຊາວລາວເຜົ່າມົ້ງ ຜູ້ສມັກໃຈ ກັບຄືນລາວ ຊຸດທຳອິດ 448 ຄົນ ເມື່ອເວລາ ປະມານ 9 ໂມງເຊົ້າ ຂອງວັນຈັນ ວັນທີ່ 28 ທັນວານີ້, ອີງຕາມ ຄໍາເວົ້າ ຂອງ ເຈົ້າໜ້າທີ່ ທະຫານໄທ.
-
ອາວະຣີ
2009-12-28 -
-
-
ພັນເອກ ທະນະ ຈາຣຸວັດ, ເສນາທິການ ກອງອຳນວຍການ ຮັກສາຄວາມໝັ້ນຄົງພາຍໃນ ຂອງໄທ, ກ່າວວ່າ:
”ຈຳນວນ ທີ່ແນ່ນອນ ສຳຣັບຊຸດທີ່ນຶ່ງ ຊຶ່ງເດີນທາງກັບໄປ ຮຽບຮ້ອຍແລ້ວ ກໍມີຈຳນວນ 448 ຄົນ ເປັນຊາຍ 248 ຄົນ ຍິງ 200 ຄົນ.”
ຂະບວນ ຣົດບັນທຸກ 16 ຄັນ ຂົນເອົາ ຊາວລາວເຜົ່າມົ້ງ ເຫລົ່ານີ້ ອອກຈາກສູນ ບ້ານຫ້ວຍນ້ຳຂາວ ແຂວງເພັດສະບູນ ຂອງໄທ ຜ່ານນັກຂ່າວ ຄະນະຜູ້ຕາງໜ້າທາງການລາວ ແລະ ຊາວມົ້ງໄທ 100 ກວ່າຄົນ ທີ່ຢືນໂບກມື ຢູ່ແຄມທາງ ເພື່ອໃຫ້ກຳລັງໃຈ. ຂະບວນຣົດ ດັ່ງກ່າວ ມຸ້ງໜ້າໄປທີ່ ຂົວມິດຕະພາບລາວ-ໄທ ທີ່ເມືອງໜອງຄາຍ ຂອງໄທ ແລ້ວຈະຂ້າມໄປ ນະຄອນຫລວງວຽງຈັນ ຫລັງຈາກນັ້ນ ຊາວມົ້ງຈະຖືກສົ່ງໄປ ທີ່ບ້ານຕ້ອນຮັບ ຊົ່ວຄາວ ທີ່ແຂວງບໍຣິຄຳໄຊ.
ພັນເອກ ທະນະ ຈາຣຸວັດ ກ່າວຢ້ຳວ່າ ຊາວລາວເຜົ່າມົ້ງ ທີ່ຖືກສົ່ງກັບຄືນລາວ ເທື່ອນີ້ ເປັນພວກທີ່ສມັກໃຈ. ປັດຈຸບັນ ມີຜູ້ສມັກໃຈ ກັບຄືນລາວ ປະມານ 2,100 ຄົນ ໃນຈຳນວນ ທັງໝົດ 4,382 ຄົນ. ໃນຂະນະນີ້ ເຈົ້າໜ້າທີ່ ທີ່ກ່ຽວຂ້ອງ ຂອງໄທ ກຳລັງເກັ້ຍກ່ອມ ໃຫ້ຊາວລາວເຜົ່າມົ້ງ ທີ່ບໍ່ສມັກໃຈນັ້ນ ສມັກໃຈກັບຄືນ ປະເທດລາວ ໂດຍດີ.
ສ່ວນຊາວລາວເຜົ່າມົ້ງ 158 ຄົນ ທີ່ຖືກກັກຂັງ ຢູ່ເມືອງໜອງຄາຍນັ້ນ ພັນເອກ ທະນະ ເວົ້າວ່າ ຊາວມົ້ງພວກນີ້ ເປັນຄວາມຮັບຜິດຊອບ ຂອງກອງທັບ ພາກທີ່ 2 ຂອງໄທ ວ່າ ຈະດຳເນີນການແນວໃດ ກັບພວກຂະເຈົ້າ.