ລາວ ສລອງວັນ ໂຣກເອດສ໌ ໂລກ ທີ 1 ທັນວາ
ສູນກາງ ຕ້ານໂຣກເອດສ໌ ທີ່ນະຄອນຫຼວງວຽງຈັນ ຈັດການແຂ່ງຂັນ ກິລາ ເພື່ອສະຫຼອງ ວັນຕ້ານໂຣກ ເອດສ໌ ສາກົນ.
-
ຊິດນີ ຣາຍງານ
2008-12-01 -
-
-
ເຈົ້າໜ້າທີ່ ຈາກ ສູນກາງ ຕ້ານ ໂຣກເອດສ໌ ທີ່ນະຄອນຫຼວງວຽງຈັນ ເວົ້າວ່າ: ໃນແຕ່ລະປີ ວັນຕ້ານ ໂຣກເອດສ໌ ສາກົນ ທາງການ ແຂວງວຽງຈັນ ແລະ ໜ່ວຍງານ ທີ່ກ່ຽວຂ້ອງ ກໍພາກັນ ຈັດກິດຈະກຳ ຕ່າງໆ ເພື່ອເປັນການ ປຸກຣະດົມ ປະຊາຊົນ ກ່ຽວກັບ ບັນຫາໂຣກເອດສ໌ ດັ່ງທ່ານ ກ່າວ ໃນຕອນນຶ່ງ ວ່າ:
“ຈະມີ ແຕ່ສູນຕ້ານເອດສ໌ ຂອງພວກເຮົາ ໄດ້ຈັດກິດຈະກຳ ໃຫ້ພະນັກງານ ມີການຫິ້ຼນກິລາແລະ ພວກ UN ອົງກອນ ຈັດຕັ້ງ ຂອງ UN ກໍໄດ້ ສະເຫຼີມສະຫຼອງ ໂຄສະນາ ມື້ວັນສຸກທີ່ຜ່ານມາ.”
ນາງວ່າ ກິດຈະກຳ ທີ່ພວກນາງ ຈັດຂຶ້ນນັ້ນ ກໍແມ່ນ ການແຂ່ງຂັນ ກິລາ ຣະຫວ່າງ ຄົນ ທີ່ຕິດເຊື້ອ HIV ກັບ ພະນັກງານ ຂອງສູນກາງ ເພື່ອສ້າງ ຄວາມສຳພັນ ຣະຫວ່າງກັນ ໃນເວລາດຽວກັນ ກໍເພື່ອ ສະແດງອອກ ເຖິງ ຄວາມບໍ່ລັງກຽດ ທີ່ຈະຢູ່ ຮ່ວມກັນ ກັບຄົນ ທີ່ຕິດເຊື້ອ HIV ຈາກສັງຄົມ ທົ່ວໄປ.
ບັນຫາໂຣກເອດສ໌ ເປັນບັນຫາສຳຄັນ ໃນການພັທນາ ເສຖກິດ ແລະ ສັງຄົມ ໃນລາວ ໃນປັດຈຸບັນ ເພາະຈຳນວນ ຜູ້ຕິດເຊື້ອ ກໍເພີ້ມຂຍາຍຕົວຂຶ້ນ ເລື້ອຍໆ ໃນແຕ່ລະປີ ນາງກ່າວ ເພີ້ມອີກ ວ່າ:
“ກໍມີ ແຕ່ຈະ ໃຫ້ຕອບ ຊັດເຈນ ວ່າ ມີຈັກເປີເຊັນນີ້ ກໍ່ຕອບ ບໍ່ໄດ້ ພວກເຮົາ ກໍພະຍາຍາມ ໃຫ້ຂໍ້ມູນ ຂ່າວສານ ເພີ້ມກວ່າເດີມ ໃນການປະຊາສຳພັນ ຊາວບ້ານ ກ່ຽວກັບ ບັນຫານີ້.”
ເປັນທີ່ ຄາດກັນ ວ່າ ການແຜ່ລາມ ຂອງເຊື້ອ HIV ໃນລາວ ແມ່ນເກີດມາຈາກ ການຂຍາຍຕົວ ຂອງນັກທ່ອງທ່ຽວ ແລະ ການເຄື່ອນຍ້າຍ ຂອງແຮງງານ ຕ່າງດ້າວ ໃນລາວ ປັດຈຸບັນ ການຕິດເຊື້ອ HIV ໃນລາວ ກໍ່ມີຈຳນວນເພີ້ມຂຶ້ນ ຍັງມີຫຼາຍຄົນ ທີ່ບໍ່ອອກມາ ໃຫ້ການບຳບັດເປັນເພາະ ຢ້ານສັງຄົມລັງກຽດ.