ບໍຣິຄໍາໄຊ ເຝົ້າຣະວັງຜູ້ ຕິດເຊື້ອ ໄຂ້ຫວັດຫມູ

• ມະນີຈັນ
  2009-07-22

ພາຍຫລັງມີຜູ້ ເສັຽຊີວິດຈາກເຊື້ອ ໄຂ້ຫວັດຫມູ ສາຍພັນ A H1N1 ໃນແຂວງບໍຣິຄໍາໄຊ ເປັນຣາຍທໍາອິດ ຢູ່ລາວ ທາງໂຮງໝໍແຂວງ ບໍຣິຄໍາໄຊ ກໍເຝົ້າຣະວັງ ຄົນເຈັບອີກ4ຣາຍ ທີ່ໄດ້ໃກ້ຊິດກັບ ຜູ້ເສັຽຊີວິດນັ້ນ ພ້ອມທັງເຜີຍວ່າ ຄົນຕິດເຊື້ອທີ່ມີ ໂຣກແຊກຊ້ອນ ຄົນຊລາ ແລະເດັກນ້ອຍ ເປັນກຸ່ມທີ່ມີ ຄວາມສ່ຽງຕໍ່ຊີວິດ.

ເຈົ້າໜ້າທີ່ຜແນກ ສາທາຣະນະສຸກ ແຂວງບໍຣິຄໍາໄຊ ກ່າວກ່ຽວກັບເລື້ອງນີ້ວ່າ:

"ກໍຣະນີນີ້ ເຮົາກໍກໍາລັງ ສືບສວນສອບສວນ ນໍາຄອບຄົວ ຜູ້ທີ່ເສັຽຊີວິດ ໄປແລ້ວເນາະ ມີ2ກໍຣະນີ ໃນຄອບຄົວຂອງ ເຂົາເຈົ້ານັ້ນນະ ພນັກງານແພດເຮົາ ກໍປະມານ 2ກໍຣະນີ ພນັກງານແພດ ທີ່ເຮັດວຽກຢູ່ ສຖານບໍຣິການ ຢູ່ຫ້ອງສຸກເສີນ ທີ່ໄດ້ພົວພັນກັບ ຜູ້ເສັຽຊີວິດນັ້ນ."

ຜູ້ປ່ວຍທັງສີ່ຄົນນັ້ນ ຂນະນີ້ປີ່ນປົວ ຢູ່ໂຮງໝໍແລະ ມີອາການດີຂຶ້ນ ຊຶ່ງຈະຕ້ອງລໍຖ້າ ຜົລການກວດຕົວຢ່າງ ໂດຍຈະຮູ້ໃນມໍ່ໆນີ້ ວ່າມີຜູ້ໃດ ເປັນຜູ້ທີ່ຕິດເຊື້ອ ໄຂ້ຫວັດຫມູ ສາຍພັນ A H1N1.

ທ່ານກ່າວຕໍ່ໄປວ່າ ຫລັງຈາກມີຜູ້ ເສັຽຊີວິດແລ້ວ ທາງຜແນກ ສາທາຣະນະສຸກ ກໍຕ້ອງມີການ ເຝົ້າຣະວັງຫລາຍຂຶ້ນ ຕ້ອງໂຄສະນາ ປະຊາສັມພັນ ໃຫ້ປະຊາຊົນ ຮູ້ຕື່ມ ແລະເຝົ້າຣະວັງ ໃນພື້ນທີ່ຊຸມຊົນ ຫລາຍຂຶ້ນ:

"ກໍຣະນີ ເສັຽຊີວີດນຶ່ງແຫລະ ຜູ້ປ່ວຍອາຈຈະມີ ພຍາດເກົ່າທີ່ແຊກຊ້ອນ ແລ້ວເນາະ ພວກທີ່ເປັນເບົາຫວານ ເປັນຫອບຫືດ ແລ້ວກໍໂຣກອ້ວນ ແລ້ວຜູ້ສູງອາຍຸ    ແລ້ວກໍເດັກນ້ອຍ ຕ້ອງໄດ້ປ້ອງກັນ ຢ່າງດີ."

ຢູ່ລາວ ມາຮອດມື້ນີ້ ມີຄົນເຈັບຕິດເຊື້ອ ໄຂ້ຫວັດຫມູ ສາຍພັນ A H1N1 ທັງໝົດ51ຄົນ. ໃນນັ້ນປົວເຊົາແລ້ວ 47ຄົນ ເສັຽຊີວິດ1ຄົນ ແລະອີກ3ຄົນ   ກໍາລັງປີ່ນປົວຢູ່.