ຍິງຖືພາ ມີໂອກາດ ໄປອອກລູກ ທີ່ໂຮງໝໍ ຫລາຍຂຶ້ນ
ຊາວແຂວງບໍ່ແກ້ວ ລຸ້ນໜຸ່ມນ້ອຍ ມີໂອກາດເກີດລູກ ຢູ່ໂຮງໝໍຫລາຍຂຶ້ນ ຍ້ອນຄວາມສະດວກ ຂອງຖະນົນຫົນທາງ ສັນຈອນໄປມາ.
-
ມະນີຈັນ ຣາຍງານ
2008-07-30 -
-
-
ການເກີດລູກ ແລະ ຝາກທ້ອງ ຂອງແມ່ຍີງ ທີ່ຖືພາມານ ແຂວງບໍ່ແກ້ວ ເປັນເລື່ອງ ທີ່ຂ້ອນຂ້າງ ຫຍູ້ງຍາກ ແລະ ເສັຽເວລາຫລາຍ ໃນເມື່ອກ່ອນ ໂດຍສະເພາະ ໃນເຂດຊົນນະບົດ ຫ່າງໄກ ຍ້ອນສະພາບ ຂອງຖະນົນຫົນທາງ. ແຕ່ມາ ໃນປັດຈຸບັນ ຖະນົນຫົນທາງ ໄດ້ຮັບການປັບປຸງ ໃຫ້ດີຂຶ້ນ ແລະ ປະຊາຊົນ ກໍນິຍົມກັນ ໄປອອກລູກ ຢູ່ໂຮງໝໍ ຫລາຍຂຶ້ນ, ຕາມຄໍາເວົ້າ ຂອງເຈົ້າໜ້າທີ່ ສາທາຣະນະສຸກ ແຂວງບໍ່ແກ້ວ.
ທ່ານກ່າວວ່າ:
“ສ່ວນຫລາຍ ບໍ່ໄດ້ເກີດ ຢູ່ບ້ານແລ້ວ ທຽບໃສ່ ເມື່ອກ່ອນ ກໍເກີດ ຢູ່ບ້ານ 50-60 ເປີເຊັນ ພຸ້ນລະ ແຕ່ວ່າ ມາປັດຈຸບັນ 4-5 ປີ ເຂົາເຈົ້າ ກໍມາຝາກທ້ອງຢູ່ ສຸກສາລາບໍ່ ຫລືວ່າ ໂຮງໝໍເມືອງ ຄັນເປັນໄປໄດ້ ທາງຄົມມະນາຄົມສະດວກ ກໍມາເກີດ ຢູ່ເມືອງ.”
ແລະວ່າ ໄດ້ມີ ການກະຈາຍ ງົບປະມານ ຂອງຣັຖບານ ອອກສູ່ ຊົນນະບົດ ເພື່ອກໍ່ສ້າງ ຖະນົນ ຈາກຕົວເມືອງ, ສ້າງໂຮງໝໍ ແລະ ສູນສາທາຣະນະສຸກ ເພີ່ມຫລາຍຂຶ້ນ. ການອອກລູກ ຂອງຊາວບ້ານ ເຂດຊົນນະບົດ ມີຂໍ້ສະດວກຫລາຍຂຶ້ນ ເພາະຖະນົນ ແຕ່ລະສາຍ ເຂົ້າເຖິງໝູ່ບ້ານ ປະຊາຊົນ. ແຕ່ບັນຫາ ໃນຕອນນີ້ ກໍແມ່ນ ເລື່ອງແພດໝໍ ບໍ່ພຽງພໍ. ບາງບ່ອນ ມີພຽງ ພະນັກງານ ທົ່ວໄປ ເທົ່ານັ້ນ. ແຕ່ເຖິງຢ່າງໃດ ກໍວ່າ ການເສັຽຊີວິດ ຂອງເດັກນ້ອຍເກີດໃໝ່ ໃນລາວ ມີຈໍານວນຫລຸດໜ້ອຍ ລົງ.
ຣາຍງານ UNESCAP ເວົ້າວ່າ ປະເທດ ໃນພູມີພາກ ເອເຊັຽຕາເວັນອອກ ສ່ຽງໃຕ້ ເຊັ່ນ ວຽດນາມ ອິນໂດເນເຊັຽ ລາວ ຕີມໍຣ ຂ້ອນຂ້າງ ປະສົບຄວາມສໍາເຣັດ ໃນການແກ້ໄຂບັນຫາ ຫລຸດຜ່ອນ ອັຕຣາ ການເສັຽຊີວິດ ຂອງເດັກ ອາຍຸ ຕໍ່າກວ່າ 5 ປີ ແລະ ພົບວ່າ ບັນຫານີ້ ຮ້າຍແຮງ ຂຶ້ນຫລາຍ ໃນແຖບເອເຊັຽໃຕ້ ຊຶ່ງພົບວ່າ 2 ໃນ 5 ຂອງເດັກ ທີ່ຕາຍກ່ອນ ອາຍຸ 5 ຂວບ ໃນທົ່ວໂລກ ແມ່ນຢູ່ອິນເດັຽ. ແລະ ເດັກທີ່ຕາຍ ໃນແຕ່ລະ 100 ຄົນໃດ ມີ 6 ຄົນ ຕາຍກ່ອນຮອດ ວັນເກີດ ຄົບຮອບ 6 ປີ.