ຄ່າ ຍົກຣະດັບ ສນາມບິນຫລວງພຣະບາງ ເພີ້ມຂຶ້ນ
ໂຄງການ ປັບປຸງ ສນາມບິນ ຫລວງພຣະບາງ ປະເຊີນກັບ ຄ່າໃຊ້ຈ່າຍ ທີ່ສູງຂຶ້ນ ເນື່ອງຈາກ ສະພາບ ເສຖກິດ ປັ່ນປ່ວນ, ແຕ່ກໍຈໍາເປັນ ຕ້ອງລົງທຶນ ກໍ່ສ້າງຕໍ່ໄປ ຕາມແຜນການ.
-
ຈະເຣີນສຸກ ຣາຍງານ
2008-06-10 -
-
-
“ງົປມານ ຕ້ອງໄດ້ແກ້ໄຂ ເພາະວ່າ
ຕອນນີ້ ເງິນ ດອນລາ ສະຫະຣັດ ກໍຕົກຣາຄາ ຄ່ານໍ້າມັນ ກໍຂຶ້ນ, ວັສດຸ ການກໍ່ສ້າງ
ກໍເພີ້ມຂຶ້ນ ມັນກໍມີ ຜົນກະທົບ ກັບຜູ້ຮັບເໝົາຢູ່, ຜູ້ຮັບເໝົາ ຂະເຈົ້າ ເຮັດບໍ່ໄດ້ແທ້ໆ,
ເຮົາ ຈະບັງຄັບ ຂະເຈົ້າ ໄດ້ແນວໃດ. ສໍາຄັນ ບ່ອນວ່າ ໂຄງການໂຕນີ້ ເປັນໂຄງການ
ທີ່ຈະຕ້ອງ ໄດ້ຂຍາຍ ສນາມບິນ ອອກໄປ ແລະ ປັບປຸງ ສນາມບິນ.”
ເມື່ອທ້າຍ ປີກາຍນີ້, ທາງການລາວ ໄດ້ກູ້ຢືມ ເງິນດອກເບັ້ຍຕໍ່າ 30 ປີ ຈາກທະນາຄານ ສົ່ງເສີມ ການສົ່ງອອກ ຂອງຈີນ ປະມານ 58 ລ້ານດອນລາ ສະຫະຣັດ, ເພື່ອນໍາໄປ ຈ້າງ ເອກຊົນຈີນ ສຶກສາ ອອກແບບ ແລະ ປັບປຸງ ສນາມບິນ ຫລວງພຣະບາງ ຄືນໃໝ່ ພາຍໃນ ປີ 2012.
ພາຍຫລັງ ທີ່ເອກຊົນ ດໍາເນີນງານມາ ລະຍະນຶ່ງ ແລະ ໄດ້ພົບ ອຸປສັກ ໃນເຣື້ອງ ຄ່າໃຊ້ຈ່າຍຕ່າງໆ ທີ່ສູງຂຶ້ນນັ້ນ, ເອກຊົນ ດັ່ງກ່າວ ຈຶ່ງຫາລື ກັບທາງການລາວ ເພື່ອຢາກປັບຣາຄາ ຄ່າໃຊ້ຈ່າຍ ໃນໂຄງການນີ້ ໃຫ້ສົມກັບ ສະພາບການ ໂຕຈິງ ຄື ຈາກເດີມ 58 ລ້ານດອນລາ ສະຫະຣັດ ເພີ້ມຂຶ້ນເປັນ 70 ລ້ານດອນລາ, ຊຶ່ງທ່ານ ຢາກົວ ເວົ້າວ່າ ທາງການລາວ ກໍເຫັນດີ ກັບເຫດຜົນ, ແລະ ອາດສເນີ ກູ້ຢືມເງິນ ສ່ວນທີ່ເພີ້ມຂຶ້ນນີ້ ຈາກທະນາຄານ ສົ່ງເສີມ ການສົ່ງອອກ ຂອງຈີນ ໃນອີກບໍ່ດົນ, ເພື່ອຊ່ອຍ ໃຫ້ໂຄງການນີ້ ເດີນໜ້າໄປ ຕາມແຜນການ, ເພາະ ຈະໃຫ້ຜົນປໂຍດ ໃນລະຍະຍາວ ໂດຍສະເພາະ ເຣື້ອງການທ່ອງທ່ຽວ ຢ່າງຫລວງຫລາຍ ໃນອະນາຄົດ.
ຢ່າງໃດ ກໍດີ, ຕາມໂຄງການ ປັບປຸງສນາມບິນ ແຂວງ ຫລວງພຣະບາງ ນີ້, ຖືວ່າ ຈະມີການຂຍາຍ ອາຄານ ສະຖານທີ່, ທາງແລ່ນ, ທາງເຂົ້າຈອດ ແລະ ລານຈອດ ຂອງເຮືອບິນ ໃຫ້ກວ້າງຂວາງ, ສະດວກ ສະບາຍຂຶ້ນ ຕໍ່ການຮອງຮັບ ເຮືອບິນ ຂນາດໃຫຍ່ກ່ວາ ທີ່ເຄີຍຮອງຮັບມາ.