ຣັຖບານ ຄວນຊ່ອຍ ແກ້ໄຂບັນຫາ ວິກິຈການ ເສຖກິດ
ທ່ານ ຄໍາລືຊາ ນວນສະຫວັນ ຄະນະ ບໍດີ ເສຖະສາດ ຈາກມະຫາວິທະຍາໄລ ແຫ່ງຊາດລາວ ສະເໜີໃຫ້ຣັຖະບານ ດໍາເນີນ ມາຕະການ ແກ້ໄຂ ບັນຫາ ຄ່າຄອງຊີບ ໃນລາວ ທີ່ຖີບສູງຂື້ນ ຢ່າງຕໍ່ເນື່ອງ ຍ້ອນນໍ້າມັນແພງ ດ້ວຍມາຕະການ ລະຍະສັ້ນ ແລະ ລະຍະຍາວ ດັ່ງນີ້:
-
ສົມເນ ຣາຍງານ
2008-06-17 -
-
-
“ມາຕະການ ຊົ່ວຄາວ ສະເພາະໜ້າ ບາງປະການ ເຊັ່ນ ມາຕະການໂຈະ ຫລື ຫລຸດພາສີ ນໍາເຂົ້າ ນໍ້າມັນ ເພື່ອບັນເທົາ ຣາຄາ ນໍ້າມັນ ບໍ່ໃຫ້ສູງ ເກີນໄປ.”
ຖ້າຫາກວ່າ ຣາຄາ ສິນຄ້າ ຫາກສູງຂື້ນ ກ່ວານີ້, ທ່ານ ໄດ້ສະເໜີ ໃຫ້ ພິຈາຣະນາ ເງິນອຸດໜູນ ນໍ້າມັນ ຕໍ່ຣັຖະກອນ ທີ່ມີເງິນເດືອນ ຕໍ່າຢູ່ແລ້ວ, ເພາະວ່າ ຣັຖະກອນ ຂອງລາວ ເປັນກຸ່ມຄົນ ໃນສັງຄົມທີ່ ສ່ວນໃຫ່ຽ ແລ້ວໄດ້ຮັບ ຄວາມເດືອດຮ້ອນ ຫລາຍທີ່ສຸດ ໃນການດໍາຣົງ ຊີວິດ ປະຈໍາວັນ.
ສໍາລັບ ຣະຍະກາງ ແລະ ລະຍະຍາວນັ້ນ ທ່ານ ໄດ້ສະເໜີ ດັ່ງນີ້:
“ອາດດໍາເນີນ ນະໂຍບາຍ ການເງິນ ງົປະມານ ໂດຍເນັ້ນ ການດັດສົມ, ການແຈກ ຢາຍຄືນ ລາຍໄດ້ ໂດຍມີກົນໄກ ການໂອນ ອາກອນ ທີ່ໄດ້ຈາກ ຜູ້ທີ່ມີລາຍຮັບສູງ ສູ່ຄອບຄົວ ທີ່ມີລາຍຮັບຕໍ່າ”
ນອກຈາກນັ້ນ ທ່ານວ່າ ກໍສາມາດ ຂື້ນອັຕຣາ ພາສີ ສິ່ງຟຸມເຟືອຍ ເພື່ອເພີ້ມ ລາຍໄດ້ ໃຫ້ແກ່ຣັຖ. ເຖິງຢ່າງໃດກໍດີ ທ່ານ ຄໍາລືຊາ ຮັບຮູ້ວ່າ ມາຕຣາການເລົ່ານີ້ ເປັນມາຕະການ ທີ່ຈະແກ້ໄຂ ບັນຫາ ພຽງລະຍະສັ້ນ ເທົ່ານັ້ນ.
ການແກ້ໄຂ ບັນຫາ ຣະຍະຍາວ ແທ້ໆນັ້ນ ກໍຄືການພັດທະນາ ແລະ ຄົ້ນຫາພະລັງງານ ທາງເລືອກ ອື່ນໆ ເພື່ອຫລຸດຜ່ອນ ການນໍາເຂົ້າ ນໍ້າມັນ ຈາກຕ່າງປະເທດ ຊື່ງໃນປີຜ່ານມາ ລາວ ໄດ້ນໍາເຂົ້າ ນໍ້າມັນ ຈາກຕ່າງປະເທດ ປະມານ 535 ລ້ານລິດ. ໃນປັດຈຸບັນນີ້ ປາກົດວ່າ ມີແຕ່ບໍຣິສັດ ນໍ້າມັນລາວ ເທົ່ານັ້ນ ທີ່ຄົ້ນຄ້ວາ ແລະ ພັດທະນາ ນໍ້າມັນ ຊີວະພາບ ຈາກໝາກເຍົາ ແຕ່ວ່າ ການພັດທະນານີ້ ຍັງຢູ່ໃນ ຂອບເຂດ ຈໍາກັດຫລາຍ.