ສປປລາວ ແລະວຽດນາມ ເຊັນຂໍ້ຕົກລົງ ກ່ຽວກັບ ການສຳຣວດບໍ່ເຫລັກ ຢູ່ເຂດເມືອງ ວຽງໄຊ ແຂວງຫົວພັນ ໃນ ພາກເໜືອຂອງລາວ

• 
  2008-01-16

ຣັຖບານລາວ ແລະບໍຣິສັດ ກຸ່ມຮົ່ວພັດຂອງວຽດນາມ ໄດ້ເຊັນຂໍ້ຕົກລົງດັ່ງກ່າວ ເມື່ອ ວັນທີ່ 10 ມົກກະຣານີ້. ຝ່າຍລາວ ແມ່ນ ທ່ານ ສົມສວາດ ເລັ່ງສວັດ ຮອງນາຍົກ ຣັຖມົນຕຣີ ພ້ອມທັງເປັນຜູ້ປະຈຳການ ໃນ ຄະນະຣັຖບານລາວ ແລະທ່ານ ບໍ່ສາຍຄຳ ວົງດາຣາ ຣັຖມົນຕຣີ ກະຊວງພະລັງງານ ແລະບໍ່ແຮ່ ເປັນຂັງຂີພິຍານ ທີ່ສຳຄັນໃນພິທີ ເຊັນຂໍ້ຕົກລົງດັ່ງກ່າວ.

ສ່ວນຝ່າຍວຽດນາມ ແມ່ນ ທ່ານ ຫງຽນຮຸຍກັ່ງ ເອກອັກ ຄະຣາຊທູດວຽດນາມ ປະຈຳລາວ ເຂົ້າຮ່ວມເປັນພິຍານ. ສ່ວນຜູ້ເຊັນຂໍ້ຕົກລົງ ຢ່າງແທ້ຈິງນັ້ນ ຝ່າຍລາວ ແມ່ນ ທ່ານ ທອງມີ ພົມວິໄຊ ຮອງຄະນະ ກັມມະການ ແຜນການ ແລະການລົງທຶນ; ຝ່າຍວຽດນາມ ແມ່ນທ່ານ ຈັນດິນລອງ ຜູ້ອຳນວຍການບໍຣິສັດຮົ່ວພັດ.

ຂໍ້ຕົກລົງສະບັບນີ້ບົ່ງໄວ້ວ່າ ຣັຖບານລາວ ໄດ້ຕົກລົງໃຫ້ບໍຣິສັດ ຮົ່ວພັດຂອງວຽດ ນາມ ສຳຣວດຂຸດຄົ້ນບໍ່ເຫລັກ ຢູ່ໃນບໍຣິເວນ ພື້ນທີ່ປະມານ 112 ກິໂລແມັດ ມົນທົນ ໃນເຂດບ້ານວຽງໄກ່ ເມືອງວຽງໄຊ ແຂວງຫົວພັນ.

ປັດຈຸບັນ ຣັຖບານລາວ ກຳລັງອະນຸຍາດ ໃຫ້ຕ່າງປະເທດ ສຳຣວດ ແລະຂຸດຄົ້ນບໍ່ ແຮ່ຫລາຍ; ບໍ່ໃຫຍ່ກວ່າໝູ່ ກໍແມ່ນບໍ່ຄຳເຊໂປນ ທີ່ແຂວງສວັນນະເຂດ ຂຸດຄົ້ນ ໂດຍບໍຣິສັດໂອຊີອານນາ ຂອງອອສເຕຣເລັຍ ແລະບໍຣິສັດ Pan Australian Resources ກໍກຳລັງຂຸດຄົ້ນ ບໍ່ຄຳທີ່ພູຄຳເຊັ່ນກັນ. ນອກຈາກນັ້ນ ຣັຖບານລາວ ຍັງ ອະນຸຍາດໃຫ້ ບໍຣິສັດຂອງຈີນ ສຳຣວດແລະຂຸດຄົ້ນບໍ່ແຮ່ ຫລາຍໆບ່ອນໃນພາກເໜືອ ຂອງລາວ.

ອາວະຣີ ຣາຍງານ