ແຂວງຊຽງຂວາງ ມີຣາຍຮັບ ຈາກກາຣທ່ອງທ່ຽວ ປະຈຳປີ 2007 ຫລາຍກວ່າ 2 ລ້ານ ດອລລາຣ໌ສະຫະຣັຖ

ທາງກາຣແຂວງຊຽງຂວາງ ມີຣາຍຮັບຈາກທຸຣະກິຈກາຣທ່ອງທ່ຽວ ຕລອດປີ 2007 ຫລາຍກວ່າ 2 ລ້ານ ດອລລາຣ໌ສະຫະຣັຖ ຊື່ງເປັນຈຳນວນ ທີ່ເພີ່ມຂື້ນຈາກ ປີທີ່ຜ່ານມາ ແລະເຮັດໃຫ້ຣາຍຮັບ ຕໍ່ຫົວຄົນ ຫລື GDP ປະຈຳແຂວງ ສູງຂື້ນຄິດເປັນ ອັຕຣາເສລັ່ຽ ປະມານ 20 ດອລລາຣ໌ຕໍ່ຄົນ ດັ່ງທ່ານຄຳເພັຊ ພົມມະດວງໄກສອນ ຫົວໜ້າຫ້ອງກາຣທ່ອງທ່ຽວ ປະຈຳແຂວງໄດ້ກ່າວວ່າ:

(ສຽງ) “ປີ 2006-2007 ມີນັກທ່ອງທ່ຽວ ຮວມທັງໝົດ 250,531 ຄົນ ຣາຍຣັບຈາກນັກທ່ອງທ່ຽວ ໄດ້ 2,450,976 ດອລລາຣ໌ ແລະ ເປັນຣາຍຮັບເຂົ້າສັງຄົມ ແລະປະຊາຊົນ ເປັນສ່ວນໃຫຍ່."

ທ່ານຄຳເພັຊ ໄດ້ກ່າວເພີ່ມວ່າ: ຕລອດຣະຍະທີ່ຜ່ານມາ ແຂວງຊຽງຂວາງ ເປັນ ແຂວງທີ່ສຳຄັນ ແຂວງໜື່ງ ທີ່ໄດ້ສ້າງຄວາມດຶງດູດ ໃຫ້ນັກທ່ອງທ່ຽວ ເຂົ້າມາທ່ຽວຊົມທີ່ມີ ຈຳນວນເພີ່ມຂື້ນເລື້ອຽໆ ໃນແຕ່ລະປີ, ສະເພາະຣາຍໄດ້ ຈາກນັກທ່ອງທ່ຽວ ທັງໝົດ ກໍຈະກາຍໄປເປັນຣາຍຮັບ ຂອງປະຊາຊົນ ແລະອີກສ່ວນໜື່ງ ກໍເປັນພາສີຣາຍຮັບເຂົ້າ ທາງກາຣແຂວງ ເພື່ອນຳໄປພັທນາຕໍ່ໆໄປ.

ສຳຫລັບປີ 2008 ນີ້ທາງກາຣແຂວງໄດ້ ຕັ້ງເປົ້າໝາຍໃຫ້ມີນັກທ່ອງທ່ຽວເພີ່ມຂື້ນຢ່າງນ້ອຍໃຫ້ໄດ້ 10% ດັ່ງທີ່ທ່ານໄດ້ໃຫ້ ກາຣຊີ້ແຈງວ່າ:

(ສຽງ) “ພວກເຮົາຄາດກາຣຢູ່ໃນແຜນຫັ້ນທັງໝົດຈະມີ 280,000 ຄົນ ຈະມາທ່ຽວຊຽງ ຂວາງໃນປີ 2008 ນ.ີ້”

ເຖີງຢ່າງໃດກໍຕາມ ແຫ່ລງທ່ອງທ່ຽວ ທີ່ທາງກາຣກ່ຽວຂ້ອງ ໄດ້ສຳຣວຈໄວ້ແລ້ວນັ້ນ ມີທັງໝົດ 93 ແຫ່ງ ຊື່ງນອກຈາກທົ່ງໄຫຫີນ ບ່ອນທີ່ 1, 2 ແລະ 3 ແລ້ວຍັງມີບ່ອນ ຜລິດໄຫຫີນອີກ 2 ແຫ່ງ ທີ່ໄດ້ພົບເຫັນຢູ່ໃນເຂຕ 7 ໝູ່ບ້ານ ພ້ອມກັບເຂຕຊຸມຊົນ ຊາວເຂົາອີກ 10 ກວ່າແຫ່ງ ແລະນອກຈາກນັ້ນ ຍັງມີເຂຕປ່າດົງ ພູດອຍ ແລະນ້ຳຕົກ ຕາດຫລາຍໆແຫ່ງນຳດ້ວຍ.

ຫວາດ ສີມູນ ຣາຍງານ

2025 M Street NW
Washington, DC 20036
+1 (202) 530-4900
lao@rfa.org