ການໄຟຟ້າ ແຂວງຫລວງພຣະບາງ ຂາດທຶນ ມາໂດຍຕລອດ ເນື່ອງຈາກວ່າ ຊື້ໄຟຟ້າ ໃນຣາຄາແພງ ແລະ ຂາຍ ໃນຣາຄາຖືກ

• 
  2008-01-25

• ຟັງສຽງ
• Download story audio

ການໄຟຟ້າ ແຂວງຫລວງພຣະບາງ ຍັງປະສົບກັບ ບັນຫາ ການຂາດທຶນ ຢ່າງຕໍ່ເນື່ອງ ໃນທຸກໆປີ, ເນື່ອງຈາກວ່າ ທາງແຂວງ ຊື້ໄຟຟ້າ ມາຈາກຫລາຍພາກສ່ວນ ທີ່ມີຣາຄາແພງ, ແລ້ວມາຂາຍໃຫ້ປະຊາຊົນ ໃນຣາຄາ ທີ່ຖືກກ່ວາ, ຊຶ່ງບັນຫາ ດັ່ງກ່າວ ຍາກທີ່ຈະຫາທາງ ແກ້ໄຂ ໃນປັດຈຸບັນນີ້, ອີງຕາມ ຄໍາເວົ້າ ຂອງເຈົ້າໜ້າທີ່ ການໄຟຟ້າ ແຂວງຫລວງພຣະບາງ ໃນວັນພະຫັດນີ້.

(ສຽງ) “ຂາດທຶນ ຕລອດປີເລີຍ ມາຫລາຍປີແລ້ວ, ຂາດທຶນນີ້ ເຣື້ອງການລົງທຶນ ຈາກການກໍ່ສ້າງ ຄິດແລ້ວ ຮວມຣາຍວັນແລ້ວ ມັນຂາດທຶນ.”

ເຈົ້າໜ້າທີ່ ທ່ານດຽວກັນນີ້ ກ່າວຕື່ມວ່າ ການຊື້ກະແສໄຟຟ້າ ຈາກຫລາຍໆພາກສ່ວນ ກໍມີຣາຄາແພງ, ແຕ່ມາ ຈໍາໜ່າຍໃຫ້ປະຊາຊົນ ໃນຣາຄາຖືກກ່ວາ ຣາຄາທີ່ຊື້. ເຖິງແມ່ນວ່າ ທາງຣັຖບານ ໄດ້ປັບຄ່າໄຟຟ້າ ສູງກ່ວາເກົ່າ, ແຕ່ກໍຍັງ ບໍ່ສາມາດ ເຮັດໃຫ້ບັນຫາ ການຂາດທຶນນີ້ ໝົດໄປໄດ້.

ນອກຈາກນັ້ນ, ການໄຟຟ້າ ແຂວງຫລວງພຣະບາງ ຍັງປະສົບກັບ ບັນຫາອື່ນໆ ເປັນຕົ້ນແມ່ນ ການຈ່າຍຄ່າແຮງງານ ເພີ້ມຂຶ້ນ:

(ສຽງ) “ໂຕແຮງງານ ມັນກໍຄ່ອຍປັບຂຶ້ນ ຄິດວ່າແພງ, ຄ່າແຮງງານ ຄ່າເງິນເດືອນ ເພາະວ່າ ເຮົາໄດ້ຈ້າງ ຄົນນອກຫລາຍ ເຣື້ອງເກັບບິລ ຄ່າໄຟ.”

ເຖິງຢ່າງໃດ ກໍດີ, ທ່ານ ຊີ້ແຈງວ່າ ທາງການໄຟຟ້າ ໄດ້ມີການວາງແຜນ ໃນການແກ້ໄຂ ບັນຫານີ້ ໂດຍຈະເລັ່ງໃສ່ ການເກັບຄ່າໄຟຟ້າ ໃຫ້ໄດ້ເຕັມສ່ວນ ແລະ ພະຍາຍາມ ເກັບໜີ້ ທີ່ຍັງຄົງຄ້າງຢູ່ ເພື່ອໃຫ້ການໄຟຟ້າ ຫລວງພຣະບາງ ມີຣາຍໄດ້ເພີ້ມຂຶ້ນ.

ຈະເຣີນສຸກ ຣາຍງານ

• ຟັງສຽງ
• Download story audio