ສູນສິ່ງພິມຕ່າງໆຂອງລາວ ຍັງບໍ່ສາມາດ ຄວບຄຸມ ການແຜ່ລະບາດ ຂອງການປອມແປງ ວີຊີດີພາບພະຍົນ ແລະວີຊີດີເພລງໄດ້

• 
  2008-02-29

ສູນສິ່ງພິມຕ່າງໆຂອງລາວ ຍັງບໍ່ສາມາດຄວບຄຸມ ການແຜ່ລະບາດ ຂອງການ ປອມແປງວີຊີດີ ພາບພະຍົນ ແລະວີຊີດີເພລງໄດ້, ຍັງມີການລະເມີດ ລິຂະສິດ ໃນການກ່າຍທຳຢູ່ຕຣອດ ເພາະວ່າ ເອກະຊົນເປັນຜູ້ທຳເອງ ດັ່ງທີ່ເຈົ້າໜ້າທີ່ລາວ ຄົນນຶ່ງ ປະຈຳຜະແນກ ຄອມປູຍເຕີ້ ຂອງສຳນັກພິມ ແລະວີດີໂອ ໃນນະຄອນຫລວງ ວຽງຈັນ ໄດ້ກ່າວເປັນພາສາໄທວ່າ:

(ສຽງ) "ກໍ່ຂ້ອນຂ້າງມີຫລາຍ ສ່ວນມາກກໍຈະເປັນເພງ ມີຮ້ານເອກະຊົນເຂົາກ່າຍທຳ ເອງ ເຮົາກໍບໍ່ສາມາດຄວບຄຸມໄດ້ເຣື້ອງນີ້. ກ່ຽວກັບການຄວບຄຸມນີ້."

ທ່ານວ່າ ທາງສູນສຳນັກພິມ ກໍໄດ້ອອກໄປກວດກາ ຢູ່ຕາມຮ້ານຕ່າງໆ ໃນແຖວ ຕະລາດ ນະຄອນຫລວງວຽງຈັນ ວ່າມີແຜ່ນວີຊີດີປອມ ແອບຊ້ອນຂາຍ ຢູ່ນຳຫລືບໍ່ ເມື່ອກວດເຫັນແລ້ວ ກໍທຳລາຍແຜ່ນຊີດີປອມຖິ້ມ.

ກ່ຽວກັບເຣື້ອງລິຂະສິດນີ້ ທ່ານ ສົມຈິດ ໃສສວນ ຫົວໜ້າຫ້ອງການ ສິນລະປະກັມ ໄດ້ໃຫ້ຄຳອະທິບາຍຕື່ມວ່າ:

(ສຽງ) "ຖ້າເກີດມີຜູ້ຮ້ອງຮຽນ ເຮົາກໍຕ້ອງສືບສວນ ເມື່ອພົບເຫັນ ກໍຈະຖືກດຳເນີນຄະດີແພ່ງ ຫລັງຈາກນັນ ກໍຈະມີການປັບໃໝ ຕາມມູນຄ່າ ການເສັຽຫາຍ."

ໃນປັດຈຸບັນນີ້ ບັນຫາການລະເມີດລິຂະສິດ ກ່າຍທຳ ວີຊີດີພາບພະຍົນ ແລະ ວີຊີດີເພງ ຈາກສິນຄ້າ ແບບສະບັບເດີມ ມີເພີ້ມຂື້ນ ເນື່ອງຈາກວ່າຂອງກ່າຍທຳ ມີຣາຄາຖືກ ແລະມີຄຸນະພາບ ທີ່ໄກ້ຄຽງກັບຂອງແທ້.

ສົມເນ ຣາຍງານ