ຜົນໄດ້ແລະຜົນເສັຽໃນການເຂົ້າຮ່ວມການຄ້າເສຣີ

• 
  2007-09-07

ສມັຍນີ້ແມ່ນສມັຍເປີດການຄ້າເສຣີ. ສະມາຄົມ ປະຊາຊາດເອເຊັຍຕາວັນອອກສ່ຽງໃຕ້ ຫຼືອາຊ່ຽນ ກໍກຳລັງເປີດການຄ້າເສຣີຣະຫວ່າງກັນ ແລະກັບປະເທດອື່ນໆ; ສະມາຊິກ ອາຊ່ຽນເກົ່າ ເຊັ່ນ ໄທ, ມາເລເຊັຍ ສິງກະໂປ, ຟີລິບປິ່ນ ແລະອິນໂດນີເຊັຍ ໄດ້ເລີ້ມເປີດການຄ້າເສຣີ ຣະຫວ່າງກັນແລ້ວ; ສ່ວນສະມາຊິກໃໝ່ ຄື ລາວ, ພະມ້າ, ວຽດນາມ ແລະກຳພູຊານັ້ນ ກຳນົດຈະເປີດການຄ້າເສຣີພາຍ ໃນປີ 2008.

ສຳຣັບສະເພາະສປປລາວ ເມື່ອເດືອນກໍຣະກະດາ ສະພາແຫ່ງຊາດລາວ ກໍໄດ້ຮັບ ຜ່ານກົດໝາຍ ກ່ຽວກັບການຫລຸດພາສີສິນຄ້າຂາເຂົ້າ-ຂາອອກ ຊຶ່ງໄດ້ບົ່ງໄວ້ວ່າ ສປປລາວ ຈະເລີ້ມເກັບພາສີໜ້ອຍລົງ ຄືໃນຣະຫວ່າງ 0 ເຖິງ 5 ສ່ວນຮ້ອຍ ຕໍ່ສິນຄ້າ ຈາກຕ່າງປະເທດພາຍໃນປີ 2008 ເປັນຕົ້ນໄປ. ການຫລຸດພາສີສິນຄ້າໃຫ້ແກ່ກັນ ກໍແປວ່າ ການເປີດ ການຄ້າເສຣີຣະຫວ່າງກັນນັ້ນແຫລະ.

ການຄ້າເສຣີໃຫ້ປະໂຫຍດ 3 ຢ່າງ ດັ່ງນີ້: 1. ຕ່າງປະເທດຈະມາລົງທຶນຫຼາຍຂື້ນ. 2. ການຄ້າເສຣີຈະຊຸກຍູ້ໃຫ້ມີການຜລິດຫາຼຍຂື້ນ. 3. ສປປລາວຈະໄດ້ເປັນສະມາຊິກອົງການຄ້າໂລກ   ; ໃວຂື້ນ.

ຕໍ່ບັນຫາທີ່ວ່າ ສປປລາວ ຈະໄດ້ຮັບຜົນປະໂຍດແນວໃດຈາກການຄ້າເສຣີ ດັ່ງກ່າວ. ຜົນປະໂຍດ ອັນທີ່ນຶ່ງ ດັ່ງທີ່ໄດ້ກ່າວມາແລ້ວ ວ່າຫລາຍປະເທດ ກຳລັງນິຍົມເປີດການຄ້າ ເສຣີ; ສະນັ້ນ ໃນເມື່ອລາວ ໄດ້ເຂົ້າຮ່ວມຢູ່ໃນເຂດການຄ້າເສຣີ ລາວ ກໍມີຣະບົບ ເສຖກິດ ແລະການຄ້າສອດຄ່ອງກັບຕ່າງປະເທດ. ຕ່າງປະເທດ ກໍຈະມັກຄ້າຂາຍນຳ ມາລົງທຶນ ແລະ ໃຫ້ການຊ່ວຍເຫຼືອແກ່ລາວຫລາຍຂື້ນ.

ໃນສະພາບຄວາມເປັນຈິງ ກໍ ເປັນແບບນັ້ນແທ້ ນັບແຕ່ລາວເປີດກ້າວ ຕໍ່ໂລກພາຍນອກ ເສຖກິດຂອງລາວ ກໍຂຍາຍຕົວເຖິງ 7 ສ່ວນຮ້ອຍ ໃນຣະຍະສອງສາມທີ່ຜ່ານມາ. ຕ່າງປະເທດ ກໍມາລົງທຶນຢູ່ໃນລາວ ຫລາຍຂື້ນ ເປັນຕົ້ນລົງທຶນໃນດ້ານການຜລິດກະແສໄຟຟ້າ ແຮ່ທາດ ແລະຜົນຜລິດທາງດ້ານກະສິກັມ. ຜົນປະໂຍດໃຫຍ່ອັນທີ່ສອງ ການຄ້າເສຣີ ຈະຊຸກຍູ້ສົ່ງເສີມໃຫ້ມີການຜລິດຫລາຍຂື້ນ ຢູ່ສປປລາວ ເພາະວ່າ ຫລັງຈາກເປີດການຄ້າເສຣີຣະຫວ່າງກັນແລ້ວ ປະເທດລາວ ກໍມີສິດສົ່ງສິນຄ້າໄປຂາຍໃນປະເທດ ສະມາຊິກ ດ້ວຍກັນຢ່າງເສຣີ ໝາຍຄວາມວ່າ ຣັຖບານ ຈະບໍ່ມີສິດເກັບພາສີສິນຄ້າເລີຍຫຼືເກັບກໍໜ້ອຍ ຄືບໍ່ກາຍ 5 ສ່ວນຮ້ອຍ. ໃນເມື່ອມີສິດສົ່ງສິນຄ້າໄປຂາຍຢ່າງເສຣີ ປະຊາຊົນຜູ້ຜລິດ ກໍຈະຮັ່ງມີເປັນດີຂື້ນ ແລະຣັຖບານ ກໍເຊັ່ນດຽວກັນ ຈະມີຣາຍໄດ້ຈາກເກັບພາສີກັບປະຊາຊົນໃນນາມນັກທຸຣະກິດບໍ່ຫລາຍ ກໍໜ້ອຍ. ກ່ຽວກັບຜົນປະໂຍດໃນດ້ານນີ້ ທ່ານ ສົມຈິດ ອິນທະມິດ ຫົວໜ້າກົມເສຖກິດ ກະຊວງ ການຕ່າງປະເທດລາວ ໄດ້ກ່າວອະທິບາຍວ່າ:

" ສ່ວນ ສປປລາວ ເຮົາເອງເຮົາກໍໄດ້ຕັດສິນໃຈເຂົ້າຮ່ວມເຮັດການຄ້າ ໃນການຄ້າອາຊ່ຽນເສຣິ ຢູ່ແລ້ວ. ຊຶ່ງຮອດປີ 2008 ພວກເຮົາກໍຈະໄດ້ຫລຸດອັດຕຣາພາສີໃຫ້ແກ່ທາງອາຊ່ຽນ. "

ຜົນປະໂຍດອັນທີ່ສາມ ໃນເມື່ອເປີດການຄ້າເສຣີກັບປະເທດອື່ນແລ້ວ ສປປລາວ ກໍ ຈະມີເງື່ອນໄຂ ໄດ້ເຂົ້າເປັນສະມາຊິກຂອງອົງການການຄ້າໂລກໄວຂື້ນ; ອົງການດັ່ງ ກ່າວ ມີຈຸດປະສົງເພື່ອສົ່ງເສີມ ການຄ້າ ເສຣີຢູ່ໃນທົ່ວໂລກ. ປັດຈຸບັນ ປະເທດທີ່ຍັງບໍ່ ທັນເປີດການຄ້າຕໍ່ໂລກພາຍນອກຫລາຍປະເທດ ກໍຍັງບໍ່ໄດ້ເຂົ້າສະມາຊິກຂອງອົງ ການດັ່ງເທື່ອ ເຊັ່ນນອກຈາກສປປລາວແລ້ວ ກໍມີວຽດນາມ ກິວບ່າ ແລະຣັດເຊັຍດັ່ງ ນີ້ເປັນຕົ້ນ.

ນັ້ນແມ່ນຜົນປະໂຍດທີ່ສຳຄັນທີ່ປະເທດລາວ ຈະໄດ້ຮັບຈາກການເປີດການຄ້າເສ ຣີ; ແຕ່ໃນຂະນະດຽວກັນ ການເປີດການຄ້າເສຣີນີ້ ກໍອາດບໍ່ເປັນຜົນດີສຳຣັບເສຖກິດ ຂອງລາວພໍເທົ່າໃດ ເຊັ່ນໃນເມື່ອເປີດການຄ້າ ເສຣີແລ້ວ ສິນຄ້າຕ່າງປະເທດ ກໍຈະ ຫລັ່ງໄຫລເຂົ້າລາວ; ສິນຄ້າເຫຼົ່ານີ້ ອາດຈະມີຣາຄາຖືກ ແຕ່ຣັຖບານ ພັດບໍ່ມີຣາຍ ໄດ້ຈາກການເກັບພາສີຫລາຍເໜືອນແຕ່ກ່ອນ ຊຶ່ງກໍໝາຍຄວາມວ່າ ຣາຍໄດ້ຂອງ ຣັຖບານລາວ ກໍຈະຕົກຕ່ຳລົງ. ແຕ່ໃດມາ ຣັຖບານລາວ ຂາດເຂີນຣາຍໄດ້ ອາໃສ ແຕ່ການເກັບພາສີ ສ່ວນນຶ່ງກໍອາໃສ ການເກັບພາສີສິນຄ້າຈາກຕ່າງປະເທດ; ສະນັ້ນ ໃນເມື່ອບໍ່ມີສິດເກັບພາສີສິນຄ້າຈາກຕ່າງປະເທດ ຣັຖບານລາວ ກໍຈະບໍ່ມີຣາຍໄດ້ ຫລາຍເທົ່າທີ່ຄວນ.

ແນວບໍ່ດີອີກຢ່າງນຶ່ງ ສປປລາວ ເປັນປະເທດນ້ອຍດ້ອຍພັທນາ ເສຖກິດອ່ອນແອ ບໍ່ສາມາດແຂ່ງຂັນ ກັບປະເທດອື່ນໄດ້; ສະນັ້ນ ໃນເມື່ອມີການເປີດການຄ້າເສຣີແລ້ວ ຈະມີການແຂ່ງຂັນຢ່າງດຸເດືອດ ລະຫວ່າງ ປະເທດສະມາຊິກ; ແຕ່ປະເທດລາ ກໍຕົກຢູ່ ໃນທ່າເສັຍປຽບ ເພາະວ່າ ຄວາມສາມາດ ໃນການແຂ່ງຂັນ ຍັງມີໜ້ອຍ; ຕົວຢ່າງ ໃນເມື່ອມີການເປີດການຄ້າເສຣີຣະຫວ່າງອາຊ່ຽນກັບຈີນ ແນ່ນອນ ວ່າລາວຈະບໍ່ສາມາດແຂ່ງຂັນກັບຈີນໄດ້ ໃນດ້ານການຜລິດສິນຄ້າເກືອບທຸກຊະນິດ ເຊັ່ນການຜລິດ ເສື້ອຜ້າແລະເຄື່ອໃຊ້ອື່ນໆ. ໃນເມື່ອບໍ່ສາມາດແຂ່ງຂັນໄດ້ ປະເທດແລະປະຊາຊົນ ລາວ ກໍຕ້ອງ ມີແຕ່ ຊື້ຂອງຕ່າງປະເທດມາກິນມາໃຊ້ ຈະກາຍເປັນສົງຄົມຜູ້ບໍຣິໂພກ ບໍ່ແມ່ນຜູ້ຜລິດ; ສະນັ້ນໃນເມື່ອມີແຕ່ຊື້ - ຂອງຕ່າງປະເທດ ເງິນຊຶ່ງລ້ວນແລ້ວແຕ່ແມ່ນ ເງິນຕຣາຕ່າງປະເທດທັງນັ້ນ ກໍຕ້ອງຮົ່ວໄຫລອອກໄປ ຕ່າງປະເທດຫລາຍ ພາໃຫ້ຢູ່ ພາຍປະເທດລາວເອງ ຂາດເຂີນເງິນຕຣາຕ່າງປະເທດ ຊຶ່ງອາດຈະພາໃຫ້ ຣາຄາເງິນ ກີບເຟີ້ ດັ່ງທີ່ເປັນມາໃນຣະຍະຫລາຍສິບປີທີ່ຜ່ານມາ. ເຖິງຢ່າງໃດກໍດີ ຖ້າມີຄວາມ ພ້ອມ ການຄ້າເສຣີ ອາດຈະເປັນປະໂຍດຫລາຍຢ່າງຕໍ່ລາວ ດັ່ງ ທ່ານ ສົມຈິດ ໄດ້ ກ່າວອີກຕອນນຶ່ງວ່າ:

" ການເປີດການຄ້າເສຣີນີ້ ມັນກໍຈະມີຜົລດີໃນຫຼາຍໆດ້ານ ເບື້ອງຕົ້ນອາດຈະມີຄວາມເຈັບປວດໜ້ອຍນຶ່ງ ຖ້າພວກເຮົາບໍ່ມີຄວາມພ້ອມ ແຕ່ວ່າຜົລຈາກການຄ້າເສຣີນີ້ ແນ່ນອນທີ່ສຸດ ມັນຈະເປັນກຳລັງເເຮງອັນນຶ່ງ ມັນກໍຈະເປີດໂອກາດໃຫ້ແກ່ນັກລົງທຶນປະເທດຕ່າງໆ ເຂົ້າມາລົງທືນຢູ່ລາວ ເພືອຫາຕະລາດຈີນ ຊຶ່ງລາວເອງ ກໍມີຊາຍແດນຕິດກັບຈີນ ກໍຈະສ້າງເງື່ອນໄຂ ສະດວກຫາຼຍຂື້ນ. "

ສະນັ້ນ ມາເຖິງຕອນນີ້ ເຮົາພໍສລຸບໄດ້ວ່າ ການເປີດການຄ້າເສຣີກັບປະເທດອື່ນ ຈະມີຜົນ ດີຕໍ່ເສຖກິດ ຂອງລາວ ໃນຫລາຍໆດ້ານ; ແຕ່ໃນຂະນະດຽວກັນ ກໍມີຜົນຮ້າຍຕິດຕາມ ມາ. ຖ້າມີຄວາມສາມາດ ແຂ່ງຂັນສູງ ເຊັ່ນມີການຜລິດຫລາຍ ມີສິນຄ້າຫລາຍ ສປປ ລາວ ຍິ່ງຈະໄດ້ຮັບຜົນປະໂຍດ ຈາກການຄ້າ ເສຣີນີ້ຫລາຍຂື້ນ.

ວິເຄາະ ໂດຍ: ອາວະຣີ

• ຟັງສຽງ
• Download story audio