ເຂື່ອນນ້ຳອູ 1 ສ້າງແລ້ວ ຊາວບ້ານ ລໍາບາກ

• ອຸ່ນແກ້ວ ສຸກສະຫວັນ
  2017-05-01

ປະຊາຊົນທີ່ໄດ້ຮັບຜົນກະທົບ ຈາກໂຄງການເຂື່ອນນ້ຳອູ 1 ຢູ່ເມືອງປາກອູ ແຂວງຫຼວງພຣະບາງ ຍັງບໍ່ທັນໄດ້ຮັບ ຄ່າຊົດເຊີຍ ໃນຜົລປູກ ຫລັງຈາກ ສ້າງເຂື່ອນນ້ຳອູ 1 ຈົນແລ້ວ. ດັ່ງປະຊາຊົນ ທ່ານນຶ່ງ ກ່າວວ່າ:

"ເຮົາຕາມຂະເຈົ້າມາສອງເດືອນແລ້ວ ສິມາຈ່າຍ ແລ້ວກາຍສອງເດືອນແລ້ວ ບໍ່ທັນມາຈ່າຍ ຄັນວ່າເປັນແນວໃດ ປະຊາຊົນ ເຊັນເຫັນດີ ເຫັນພ້ອມ ກໍໄດ້ເຊັນກັນແລ້ວ ກໍຢາກໃຫ້ມາຈ່າຍ ເຊັນໝົດແລ້ວ ປະຊາຊົນ ເຊັນແລ້ວ ນາຍບ້ານເຊັນ ທາງສິ່ງແວດລ້ອມ ຂອງເມືອງ ເຊັນແລ້ວ".

ມີຊາວບ້ານໄດ້ຮັບຜົນກະທົບ ຈາກໂຄງການດັ່ງກ່າວປະມານ 30 ຄອບຄົວ ແລະ ຈະໄດ້ຮັບຄ່າຊົດເຊີຍ ທີ່ດິນໃນລາຄາ 120,000 ກີບ ຕໍ່ແມັດກາເຣ. ເຂື່ອນນ້ຳອູ 1 ໄດ້ສ້າງສຳເຣັດແລ້ວ ແລະປະຊາຊົນ ກໍຢາກໃຫ້ໂຄງການ ມາຝຶກອາຊີບໃຫ້ເຂົ້າເຈົ້າ, ດັ່ງປະຊາຊົນທ່ານນີ້ ກ່າວຕື່ມອີກວ່າ:

"ກໍຕາມຈິດໃຈຂອງພວກເຮົາ ກໍຢາກໃຫ້ຈັດສັນອາຊີບໃຫ້ເດ້ ວ່າເຮົາກະທົບຊ່ຳນີ້ແລ້ວ ແລ້ວກໍລາຍຮັບຂອງປະຊາຊົນ ຈະໄດ້ຫລຸດຜ່ອນໄປ ຊິເຮັດໃດ ຈັດສັນອາຊີບ ໃຫ້ແກ່ປະຊາຊົນມີລາຍຮັບ ເພື່ອໃຫ້ຫລຸດຜ່ອນ ຄວາມທຸກຍາກທຸກຈົນ ປີ 2020, 2030 ບໍ່ຄິດແນວນີ້ ກໍທຸກ ຄືເກົ່າ ຫັ້ນແຫລະ".

ໂຄງການເຂື່ອນນ້ຳອູ 1 ນັ້ນເປັນນຶ່ງໃນ 7 ເຂື່ອນ ທີ່ຈະສ້າງໃສ່ ນ້ຳອູ ຊຶ່ງມີກຳລັງການຜລິດ 180 ເມັກກະວັດ ໂດຍແມ່ນ ບໍຣິສັດ ຊີໂນ ໄຮໂດຣ ຂອງຈີນ ເປັນຜູ້ ສຳປະທານ. ບົດຣາຍງານ ຜົນກະທົບ ທາງດ້ານ ສິ່ງແວດລ້ອມ ຫຼື EIA ໄດ້ລະບຸວ່າ ມີປະຊາຊົນເກືອບ 100 ຫລັງຄາເຮືອນ ໃນ 5 ບ້ານ ຈະຖືກຍົກຍ້າຍ ຈາກໂຄງການເຂື່ອນ ດັ່ງກ່າວ.