ຊາວເມືອງໂຂງ ວ່າບໍ່ໄດ້ ບຸກລຸກ ປ່າສງວນ

• ຈໍາປາທອງ
  2021-08-06

ທາງການລາວເວົ້າວ່າ ໃນປີ 2020 ຜ່ານມາ ມີປະຊາຊົນ ຈໍານວນນຶ່ງ ຢູ່ເມືອງໂຂງ ແຂວງຈໍາປາສັກ ໄດ້ບຸກລຸກປ່າສງວນແຫ່ງຊາດ ເຊປຽນ ໃນເນື້ອທີ່ປະມານ 389 ເຮັກຕາປາຍ ເພື່ອປູກມັນຕົ້ນ ແຕ່ປະຊາຊົນເວົ້າວ່າ ບໍ່ໄດ້ບຸກລຸກ ບໍ່ໄດ້ຖາງປ່າແຕ່ຢ່າງໃດ ພຽງແຕ່ ໄດ້ໃຊ້ດິນເປົ່າຫວ່າງ ໃນເຂດປ່າສງວນ ທີ່ຢູ່ໃກ້ກັບບ້ານຂອງພວກຕົນ ປູກມັນຕົ້ນຊື່ໆ ດັ່ງຊາວບ້ານ ຜູ້ນຶ່ງຢູ່ເມືອງໂຂງ ເວົ້າຕໍ່ ວິທຍຸ ເອເຊັຍເສຣີ ໃນມື້ວັນທີ 6 ສິງຫາ ນີ້ວ່າG

“ແບບວ່າມັນເປັນເຂດປ່າສງວນ ແຕ່ວ່າເຂົາບໍ່ໄດ້ເຮັດຫຍັງມາຫລາຍປີ ຫັ້ນນ່າ ເຮົາກະເລີຍໄປປູກມັນໃສ່ ຄິດວ່າມັນບໍ່ໃຊ້ເວລາ ດົນນ່າ ເຂົາບໍ່ເອົາດອກ ດິນ ມັນເອົາບໍ່ໄດ້ ກະບໍ່ໄດ້ ເປັນຫຍັງແຕ່ກີ້ຫັ້ນ ບາດປີນີ້ເຂົາສັ່ງໃຫ້ຫຼົກໂລດ ທະຫານເຂົາສັ່ງໃຫ້ຫຼົກ.”

ຊາວບ້ານຜູ້ນີ້ກ່າວຕື່ມອີກວ່າ ຫລາຍປີຜ່ານມາ ຊາວບ້ານໃນເມືອງໂຂງ ກໍໄດ້ໃຊ້ພື້ນທີ່ໃນເຂດປ່າສງວນແຫ່ງຊາດ ເຊປຽນນີ້ປູກ ມັນຕົ້ນ ແຕ່ບໍ່ເຄີຍມີບັນຫາຫຍັງເກີດຂຶ້ນ ມາດຽວນີ້ ເຈົ້າໜ້າທີ່ເວົ້າວ່າ ພົບເຫັນຊາວບ້ານ ເຂົ້າໄປບຸກລຸກປູກມັນຕົ້ນ ແລະເວົ້າວ່າ ໃຜປູກຫຍັງໃນເຂດນັ້ນ ກໍຈະຖາງຖິ້ມຈົນໝົດ, ການທີ່ຊາວບ້ານເຂົ້າໄປປູກມັນຕົ້ນໃສ່ ກໍຍ້ອນວ່າພວກເຂົາເຈົ້າ ມີທີ່ດິນທໍາກິນໜ້ອຍ ຈຶ່ງໄດ້ຂຍັບຂຍາຍໄປປູກໃສ່.

ແລະປະຊາຊົນຢູ່ເມືອງໂຂງ ອີກຜູ້ນຶ່ງ ກໍເວົ້າຕໍ່ວິທຍຸເອເຊັຍເສຣີ ໃນມື້ດຽວກັນນີ້ວ່າ ຊາວບ້ານກໍຫາຢູ່ຫາກິນ ໃນເຂດດັ່ງກ່າວມາແຕ່ ດົນນານ, ເມື່ອເຫັນວ່າມີທີ່ດິນເປົ່າຫວ່າງ ຊາວບ້ານຈໍານວນນຶ່ງ ກໍພາກັນເຂົ້າໄປປູກມັນຕົ້ນໃສ່, ບໍ່ໄດ້ມີການບຸກລຸກຖາງປ່າໃນເຂດ ປ່າສງວນ ແຫ່ງຊາດແຕ່ຢ່າງໃດ, ແຕ່ໃນເມື່ອທາງການ ແຂວງຈໍາປາສັກ ປະກາດຫ້າມບໍ່ໃຫ້ນໍາໃຊ້ ທີ່ດິນ ຢູ່ໃນເຂດປ່າສງວນນັ້ນ ແລ້ວ ປະຊາຊົນກໍບໍ່ສາມາດ ຂັດຫຍັງໄດ້, ຕ້ອງໄດ້ພາກັນໄປຊອກຫາດິນ ຢູ່ບ່ອນໃໝ່ ເພື່ອປູກຝັງ ຮວມທັງການປູກເຂົ້າ:

“ເອີ, ໂຕນັ້ນເຂດເພິ່ນຍັງປະສານກັນຢູ່ ແຕ່ວ່າຈັ່ງໃດ໋ນີ້ ມັນບໍ່ໄດ້ຮູ້ຄັກແທ້ນີ້ ບໍ່ໄດ້ບຸກເບີກເອົາດິນດອກ ມີແຕ່ປູກທັມດານາໃຜນາມັນ ບໍ່ໄດ້ເອົາດິນເອົາສັງ ມີແຕ່ວ່າປູກຕາມທັມຊາດ ເພິ່ນໃຫ້ເຊົາເຂົາກະເຊົາ.”

ກ່ຽວກັບເຣື່ອງທີ່ວ່ານີ້ ປະຊາຊົນອີກຜູ້ນຶ່ງ ຢູ່ເມືອງໂຂງ ແຂວງຈໍາປາສັກ ກໍຢືນຢັນວ່າບໍ່ມີຊາວບ້ານ ເຂົ້າໄປຖາງປ່າເພື່ອບຸກເບີກ ທີ່ ດິນປູກຝັງ ຢູ່ໃນເຂດປ່າສງວນແຫ່ງຊາດເຊປຽນ ພຽງແຕ່ໄດ້ນໍາໃຊ້ພື້ນທີ່ເປົ່າຫວ່າງ ທີ່ຢູ່ໃກ້ບ້ານ ຂອງ ພວກເຂົາເຈົ້າ ປູກມັນຕົ້ນ ແບບປີ ຕໍ່ປີໄປ, ບໍ່ແມ່ນປູກໄລຍະຍາວ:

“ໂອ໋, ແຖວປ່າສງວນນີ້ບໍ່ໄດ້ມີໃຜປູກດອກ ມີແຕ່ປູກຢູ່ນໍາດິນແຖວຫວ່າງໆ ບໍ່ມີໆ ມີແຕ່ປູກດິນໃຜດິນັນ ປ່າສງວນກະທາງບ້ານເຂົາ ຫ້າມ ເຂົາກະບໍ່ຫານເຮັດ ແຕ່ວ່າເຂົາປູກຫລາຍຢູ່ ແຕ່ວ່າປ່າສງວນ ກະບໍ່ມີໃຜຫານເຂົ້າດອກ ເພາະທາງບ້ານເຂົາກະຫ້າມ.”

ເວົ້າເຖິງບ້ານທີ່ຢູ່ໃກ້ເຂດປ່າສງວນ ແຫ່ງຊາດເຊປຽນຢູ່ເມືອງໂຂງ ເຈົ້າໜ້າທີ່ຜແນກກະສິກັມ ແລະປ່າໄມ້ ແຂວງຈໍາປາສັກກ່າວຕໍ່ ວິທຍຸເອເຊັຍເສຣີ ໃນວັນທີ 6 ສິງຫາ ນີ້ວ່າມີ 12 ບ້ານ, 317 ຄອບຄົວ ຊຶ່ງຢູ່ມາກ່ອນທາງການ ປະກາດເຂດນັ້ນເປັນປ່າສງວນ ແຫ່ງຊາດ, ຊາວບ້ານສ່ວນໃຫຍ່ ມີອາຊີບປູກມັນຕົ້ນ ແລະເຮັດນາ. ປັດຈຸບັນຢູ່ບ້ານນັ້ນ ທຸກຄອບຄົວມີໃບຕາດິນຖາວອນ ແລ້ວ ບາງຄອບຄົບກໍມີດິນໜ້ອຍ ບາງຄອບຄົວກໍມີດິນຫລາຍ. ໃນຈໍານວນຄອບຄົວທີ່ວ່ານີ້ ບາງຄອບຄົວໄດ້ບຸກລຸກ ພື້ນທີ່ປ່າສງວນ ແຫ່ງຊາດ ເຊປຽນແທ້ ແຕ່ກໍບໍ່ໄດ້ຖືກລົງໂທດ, ມີແຕ່ໄດ້ສຶກສາອົບຮົມ ໃຫ້ຄວາມຮູ້ກ່ຽວກັບ ສິດນໍາໃຊ້ທີ່ດິນ ແກ່ພວກເຂົາເຈົ້າ.

ທ່ານເວົ້າວ່າ ສາເຫດທີ່ພາໃຫ້ພວກເຂົາເຈົ້າ ບຸກລຸກປ່າສງວນແຫ່ງຊາດ ນັ້ນ ແມ່ນເປັນຍ້ອນມັນຕົ້ນໄດ້ຮັບຄວາມນິຍົມຫລາຍ, ເປັນ ສິນຄ້າຂ້ອນຂ້າງມີຣາຄາດີ ແລະຈໍານວນ ປະຊາຊົນ ຢູ່ໃນບ້ານເພີ່ມຂຶ້ນ ເຮັດໃຫ້ມີຄວາມຕ້ອງການ ພື້ນທີ່ທໍາການກະເສດຫລາຍຂຶ້ນ:

“ດຽວນີ້ເວົ້າແຈ້ງໆວ່າ ມັນຕົ້ນເຂົ້າມາແຮງເນາະ ມັນກະມີປະຊາຊົນ ຈໍານວນນຶ່ງ ສົມມຸດວ່າໃນບ້ານນຶ່ງ ກະມີຢູ່ປະມານ 5-6 ຄອບຄົວ ພະນັກງານເຂົາເຈົ້າ ກະໄດ້ໄປເຮັດເຣື່ອງ ການຈັດສັນໃຫ້ຢູ່ ກະຍ້ອນມັນແບບລັກສນະວ່າ ການເພີ່ມຂຶ້ນຂອງພົລເມືອງ ນີ້ແຫລະ ມັນເພີ່ມຂຶ້ນແລ້ວກະ ຄວາມຕ້ອງການ ຂະເຈົ້າກະມີຫລາຍວ່າຊັ້ນສະ.”

ເພື່ອແກ້ໄຂບັນຫາ ດັ່ງກ່າວ ທາງການແຂວງຈໍາປາສັກ ຈະກວດກາ ທີ່ຕັ້ງຂອງດິນຊາວບ້ານ ຄືນໃໝ່ ແລະໃນກໍຣະນີທີ່ຊາວບ້ານຍັງ ສືບຕໍ່ບຸກລຸກປ່າສງວນແຫ່ງຊາດ ເຊປຽນ ໃນປີ 2021 ນີ້ ທາງເຈົ້າໜ້າທີ່ ກໍຈະບັງຄັບໃຊ້ກົດໝາຍ ແລະໃຫ້ຜູ້ບຸກລຸກນັ້ນທົດແທນ ຄວາມເສັຍຫາຍ ແລະ ຟື້ນຟູສະພາບປ່ານັ້ນຄືນ.

ປ່າສງວນແຫ່ງຊາດເຊປຽນ ມີເນື້ອທີ່ປະມານ 240,000 ເຮັກຕາ, ກວມເອົາພື້ນທີ່ ແຂວງຈໍາປາສັກ ແລະ ແຂວງອັດຕະປື. ປັດຈຸບັນ ສິ່ງແສດລ້ອມຫລາຍຢ່າງ ໃນປ່າສງວນແຫ່ງນີ້ ກໍາລັງປະເຊີນກັບພັຍຄຸກຄາມ ເນື່ອງຈາກວ່າ ທາງການລາວອະນຸຍາດ ໃຫ້ນັກລົງທຶນ ເຂົ້າມາ ສໍາປະທານສ້າງໂຮງງານປຸ໊ຍ ແລະ ເຂື່ອນໄຟຟ້າໃສ່ ໃນຂນະທີ່ ເມື່ອຕົ້ນປີ 2021 ນີ້ ທາງການແຂວງຈໍາປາສັກ ໄດ້ສເນີ ແຜນ ທີ່ຈະກໍານົດເອົາປ່າສງວນປຫ່ງຊາດ ເຊປຽນນີ້ ເປັນສວນອຸທຍານ ແຫ່ງຊາດ ຊຶ່ງປັດຈຸບັນ ຢູ່ໃນຂັ້ນຕອນ ຂອງການສເນີຕໍ່ ກະຊວງກະສິກັມ ແລະປ່າໄມ້.