ນໍ້າຖ້ວມຈໍາປາສັກ-ສາຣະວັນ

• 
  2013-09-24

ນໍ້າຖ້ວມຢ່າງໜັກ ຢູ່ແຂວງຈຳປາສັກ ແລະ ສາຣະວັນ. ຢູ່ຈຳປາສັກ ນໍ້າຂອງລົ້ນຝັ່ງຖ້ວມບ້ານເຮືອນ ແລະທົ່ງນາປະຊາຊົນ ຫຼາຍພັນຄົນ ຈຳເປັນຕ້ອງ ໂຍກຍ້າຍ ອອກຈາກ ບໍຣິເວນ ແຄມຂອງ ໄປຢູ່ໃກ້ກັບ ຖນົນເລກທີ່ 13. ດັ່ງເຈົ້າໜ້າທີ່ ແຂວງຈຳປາສັກທ່ານນຶ່ງ ກ່າວວ່າ:

“ຈໍານວນ ຄອບຄົວ ນີ່ມີ 10,271 ຄອບຄົວ; ຈຳນວນຄົນ ນີ່ມີ 73, 751 ຄົນ ຖືວ່າເນື້ອທີ່ ທີ່ຖືກນໍ້າຖ້ວມ ນີ່ແມ່ນ 10,505 ເຮັກຕາຣ໌ ວ່າຊັ່ນຊະ ຖືກຍ້າຍ ອອກຈາກ ຈຸດສ່ຽງ ແຄມແມ່ນ້ຳຂອງ ນີ່ 99 ຄອບຄົວ ໄດ້ຍ້າຍອອກ ຈາກຈຸດສ່ຽງໄພ ວ່າຊັ່ນຊະ.”

ເຈົ້າໜ້າທີ່ເວົ້າອີກວ່າ ຣະດັບນໍ້າຂອງ ສູງຂື້ນເກີນເຂດ ອັນຕະຣາຍ ຕາມປົກກະຕິ ເຂດອັນຕະຣາຍ ແມ່ນ 16 ແມັດ; ແຕ່ເມື່ອວັນທີ່ 24 ກັນຍາ ນີ້ ສູງຂື້ນເປັນ 16.79 ແມັດ; ນໍ້າຈຶ່ງລົ້ນຝັ່ງ ຖ້ວມຫລາຍ ພື້ນທີ່ ໃນແຂວງ ຈໍາປາສັກ. ໃນຂນະດຽວກັນ ເຈົ້າໜ້າທີ່ ທ່ານນີ້ກໍໄດ້ ຮຽກຮ້ອງ ຂໍໃຫ້ ເອກກະຊົນ ອົງການແລະຣັຖບານ ໃຫ້ການຊ່ວຍ ເຫລືອ ແກ່ຜູ້ປະສົພພັຍ ໂດຍດ່ວນ ໂດຍສະເພາະ ອາຫານ ແລະ ນ້ຳດື່ມ.

ຢູ່ແຂວງສາຣະວັນ ກໍເຊັ່ນດຽວກັນ ນໍ້າຖ້ວມຫລາຍເມືອງ ໂດຍສະເພາະ ເມືອງຄົງເຊໂດນ ວາປີ ແລະ ເມືອງສາຣະວັນ; ຫລາຍບ້ານ ໄດ້ ໂຍກຍ້າຍ ໄປຢູ່ເຂດປອດພັຍ. ດັ່ງເຈົ້າໜ້າທີ່ ແຂວງສາຣະວັນ ທ່ານນຶ່ງ ເວົ້າວ່າ:

“ວິກິດໜັກໜ່ວງເລີຍ ຍ້າຍຄົນອອກມາ 30-40 ບ້ານ ມາເຕັມຢູ່ ແຄມທາງນີ່ຫລະນະ ມັນຂື້ນວັນທີ່ 17-18 ມັນຂື້ນແລ້ວ ທີ່ນຶ່ງ ຂື້ນແລ້ວມັນ ເຕັມອັດຕຣາມັນລົງລົງໄປແລ້ວຕົວນີ້ມາໃໝ່ມາຊໍ້າທີ່ມີແລ້ວຫະນະ ເມືອງ ຄົງເຊໂດນ ວາປີ 3 ເມືອງ ແຕ່ວ່າໝັກກວ່າໝູ່ ແມ່ນ ຄົງເຊໂດນ ມັນ 68 ບ້ານເດີ ເສັຍຫາຍ ຢູ່ເມືອງຄົງ ສະເພາະ ເມືອງຄົງ ກໍຍັງເກັບກໍາ ຣາຍລະອຽດຢູ່.”

ເຈົ້າໜ້າທີ່ ແຂວງສາຣະວັນ ທ່ານນີ້ ເວົ້າອີກວ່າ ບໍ່ພຽງແຕ່ນໍ້າຂອງ ເທົ່ານັ້ນ ລົ້ນຝັ່ງ ນໍ້າເຊໂດນ ກໍລົ້ນຝັ່ງ ເຊັ່ນກັນ.