ແພດອາສາ ລາອອກ ພາຍຫຼັງ ບໍ່ໄດ້ບັນຈຸ ຣັຖກອນ
ອາສາສມັກ ບໍ່ຕໍ່າກ່ວາ 5 ປີ ແຕ່ຍັງບໍ່ໄດ້ບັນຈຸ ເຂົ້າເປັນຣັຖກອນ, ຈຶ່ງເຮັດໃຫ້ ແພດອາສາສມັກ ຈຳເປັນຕ້ອງລາອອກ ເນື່ອງຈາກວ່າ ຣັຖບານ ຍັງມີ ໂຄຕ້າໜ້ອຍ.
-
ໄມຊູລີ ແລະ ໄຊຍາ
2022-11-06 -
-
-
Your browser doesn’t support HTML5 audio
ແພດອາສາສມັກ ກໍເປັນບັນຫາໃຫຍ່ ສຳລັບການບັນຈຸ ເຂົ້າເປັນຣັຖກອນ ເຖິງແມ່ນວ່າ ຣັຖບານ ຈະໃຫ້ບູຣິມະສິດ ໂຄຕ້າ ທັງແພດ ແລະ ຄຣູຈຳນວນຫລາຍ ແຕ່ກໍຍັງມີ ແພດອາສາ ທີ່ຜິດຫວັງ ບໍ່ໄດ້ບັນຈຸຣັຖ ເຖິງແມ່ນວ່າ ຈະເປັນ ອາສາສມັກ ມາແລ້ວ ບໍ່ຕໍ່າກ່ວາ 5 ປີ ແລ້ວກໍຕາມ.
ໄມຊູລີ: ສະບາຍດີ ທ່ານຜູ້ຟັງທີ່ເຄົາຣົບ… ຂໍຕ້ອນຮັບ ທຸກໆທ່ານ ເຂົ້າມາສູ່ ຣາຍການ “ມາຟັງນຳກັນ” ທີ່ນຳສເນີຂ່າວ ຕາມທີ່ ທ່ານຜູ້ຟັງ ສເນີເຂົ້າມາ. ສັປດານີ້ ມາເວົ້າເຖິງ ອາສາສມັກ ທີ່ເຮັດວຽກ ໃນອົງກອນຣັຖນັ້ນ ເປັນຕົ້ນ ແພດອາສາສມັກ ໃນຫົວຂໍ້ “ແພດອາສາ ຈຳນວນຫລາຍ ຍັງບໍ່ໄດ້ ບັນຈຸຣັຖ”. ທ່ານຜູ້ຟັງ ທີ່ຕ້ອງການ ເຂົ້າຮ່ວມ ໃນຣາຍການ ນຳພວກເຮົາ ກະຣຸນາ ສົ່ງເບີໂທຣະສັບ ຂອງທ່ານ ລົງໃສ່ ອິນບອກສ໌ ເພສ ວິທຍຸເອເຊັຽເສຣີ (RFA Lao), ແລ້ວພວກເຮົາ ຈະໂທສັມພາດ ມາອອກຣາຍການ. ສຳລັບມື້ນີ້ ດຳເນີນ ຣາຍການໂດຍ ໄມຊູລີ ແລະ ໄຊຍາ.
ໄຊຍາ: ສະບາຍດີ ທ່ານຜູ້ຟັງ… ເມື່ອເວົ້າເຖິງ ແພດອາສາສມັກ ກໍໜ້າເຫັນໃຈ ທີ່ຈິງ ນອກຈາກຄຣູອາສາ ແລະ ແພດອາສາ ແລ້ວ, ຍັງມີ ພະນັກງານອາສາສມັກ ຢູ່ໃນອົງກອນຣັຖ ເປັນຈຳນວນຫລາຍ ທີ່ບໍ່ໄດ້ບັນຈຸ. ທີ່ຜ່ານມາ ເຣື່ອງຂອງຄຣູອາສາ ແມ່ນເປັນ ຜົລສະທ້ອນ ອັນນຶ່ງ ທີ່ເຮັດໃຫ້ ຣັຖບານ ລາວຍັງແກ້ໄຂບໍ່ຕົກ ເພາະບໍ່ມີມາຕການ ທີ່ແນ່ນອນ ໃນການຮອງຮັບ ພະນັກງານອາສາສມັກ ເຫລົ່ານີ້. ຊຶ່ງອາສາສມັກແຕ່ລະຄົນ ກໍຫວັງທີ່ຈະເຂົ້າເປັນ ພະນັກງານຣັຖ. ຜ່ານມາ ກໍມີຜູ້ໄດ້ບັນຈຸ ເຂົ້າເປັນພະນັກງານຣັຖ ແຕ່ສ່ວນຫລາຍ ບໍ່ໄດ້ບັນຈຸ. ເພາະກົດໝາຽ ການຮັບຣັຖກອນ ຕ້ອງຜ່ານ ການສອບເສັງໂດຍຢູ່ພາຍໃຕ້ ການດູແລ ຂອງກະຊວງພາຍໃນ. ພ້ອມກັນນີ້ ຜ່ານມາ ຣັຖບານລາວ ໄດ້ອະນຸມັດໂຄຕ້າຮັບພະນັກງານ ຫລຸດລົງ ເນື່ອງຈາກຜ່ານມາ ພະນັກງານຣັຖ ຫລາຍເກີນໄປ ແລະ ອີກບັນຫານຶ່ງ ກໍຄືຄົນເຈົ້າ-ຄົນຂ້ອຍ ທີ່ທາງຣັຖມົນຕຣີ ກະຊວງພາຍໃນ ກໍໄດ້ອອກມາ ຊີ້ແຈງ ຢູ່ໃນກອງປະຊຸມສະພາ ເມື່ອເດືອນສິງຫາ ຜ່ານມາ. ດ້ວຍເຫດຜົລເຫລົ່ານີ້ ຈຶ່ງເຮັດໃຫ້ ພະນັກງານ ອາສາສມັກ ຈຳນວນຫລາຍ ບໍ່ໄດ້ບັນຈຸ.
ທ່ານຜູ້ຟັງ ສຳລັບມື້ນີ້ ພວກເຮົາ ຈະມາລົງເລິກ ເຣື່ອງຂອງ ແພດອາສາ ທີ່ມີຊະຕາກັມ ບໍ່ແຕກຕ່າງຫຍັງກັບຄຣູອາສາ ແລະ ພະນັກງານອາສາ ໃນຫ້ອງການ ຂອງຣັຖ. ຫລາຍຄົນ ເຮັດວຽກໜັກ ລໍຖ້າ ມາຮອດ 6-7 ປີ ອາຍຸ ເກີນບັນຈຸ ເຂົ້າຣັຖ ແລ້ວຕ້ອງໄດ້ລາອອກ. ມື້ນີ້ ພວກເຮົາ ມາຟັງນຳກັນວ່າ ຄວນຫາທາງອອກແນວໃດ. ທ່ານໃດ ຟັງຢູ່ ຊ່ອຍສະແດງຄວາມເຫັນ ໂດຍສົ່ງຄອມມເມັ້ນ ລົງເຟສບຸກຄ໌ ພວກເຮົາດ້ວຍ ເພື່ອຈະໄດ້ນຳເອົາ ຂໍ້ມູນ ມາປະກອບ ໃຫ້ຣາຍການ ເຂົ້າເຖິງ ທ່ານຜູ້ຟັງ ຫລາຍຂຶ້ນ.
…
(ເຊີນທ່ານ ຟັງຣາຍລະອຽດ ຈາກສຽງ ທີ່ໄດ້ບັນທຶກໄວ້ ຂ້າງເທິງນັ້ນ)