ຜູ້ຮັບເຄາະຈາກໄຟໄໝ້ຕລາດ ຍັງຖ້າເກີ້

• ສົມເນ
  2015-01-12

ເມື່ອ ສັປດາ ທີ່ ຜ່ານມາ ພວກແມ່ຄ້າ ຕລາດ ທົ່ງຂັນຄໍາ ເຜີຍຕໍ່ ວິທຍຸ ເອເຊັຽ ເສຣີ ວ່າມາເຖີງ ປັຈຈຸບັນ ນີ້ກໍໄດ້ ເກືອບ 10 ເດືອນ ແລ້ວ ແຕ່ຍັງມີ ແມ່ຄ້າ ຕລາດ ທົ່ງຂັນຄໍາ ຈໍານວນ ຫລວງຫລາຍ ທີ່ ຖືກເສັຽຫາຍ ຈາກ ໄຟໄໝ້ ຕລາດ ທົ່ງຂັນຄໍາ ຍັງບໍ່ໄດ້ ຮັບ ຄ່າ ຊົດເຊີຍ ຈາກ ພາກສ່ວນໃດ ທັ້ງໆທີ່ ຫລັງຈາກ ເກິດ ເຫດໄຟໄໝ້ ເມື່ອ ປີກາຍ. ເຈົ້າໜ້າທີ່ ພາກສ່ວນ ກ່ຽວຂ້ອງ ທີ່ ນະຄອນ ຫລວງ ວຽງຈັນ ໄດ້ເປິດ ໂອກາດ ໃຫ້ ພວກແມ່ຄ້າ ພໍ່ຄ້າ ຜູ້ທີ່ໄດ້ ຮັບ ຜົນເສັຍຫາຍ ຈາກ ໄຟໄໝ້ ໃຫ້ ພາກັນໄປ ລົງທະບຽນ ເປັນຣາຍລັກ ອັກສອນ ໄວ້ ເພື່ອ ແຈ້ງການ ຄວາມເສັຍຫາຍ ແລະວ່າ ທາງການ ມີ ມາຕການ ຈະຊົດເຊີຍ ໃຫ້ສ່ວນໃດ ສ່ວນນຶ່ງ ແຕ່ຮອດ ປັຈຈຸບັນ ກໍບໍ່ມີ ຫຍັງເລີຍ ດັ່ງ ແມ່ຄ້າ ຜູ້ນຶ່ງ ເວົ້າວ່າ:

“ທໍາອິດ ຫັ້ນ ເວົ້າວ່າ ຜູ້ໃດ ເສັຽຫາຍ ໜ້ອຍຫລາຍ ປານໃດ ກະອີງຕາມ ເນາະ ຫຼື ວ່າອີງຕາມ ສະພາບ, ກໍໃຫ້ໄປແຈ້ງ ເສັຽຫາຍ ໄປລົງຊື່ ຈົດທະບຽນ ຂຽນຊື່ຂຽນເບີ ອີ່ຫຍັງ ໃສ່ໝົດ ເພີ່ນ ຊິຊ່ວຍເຫລືອ ວ່າຊັ້ນ ໄປຂຽນໝົດ ທຸກຄົນ ຜູ້ໃດ ຖືກໄຟໄໝ້, ໃຜກໍໄປ ຈົດຊື່ ໄວ້ລະບໍ”.

ນາງເວົ້າ ຕໍ່ໄປວ່າ ທໍາອິດ ໃຜໆ ກໍເຊື່ອວ່າ ຈະໄດ້ຮັບ ຄ່າຊົດເຊີຍ ບໍ່ຫລາຍ ກໍຂໍໃຫ້ໄດ້ ໜ້ອຍນຶ່ງ ຈະເປັນ ສັງກະສີ ຈັກ 5 ແຜ່ນ ຫຼື ໝີ່ໄວໆ ຈັກສອງແກັສ ກໍຍັງດີ ແຕ່ມາຮອດ ດຽວນີ້ ຍັງ ບໍ່ເຫັນ ຫຍັງເລີຍ ສະນັ້ນ ຈຶ່ງຢາກ ຮ້ອງຮຽນ ເຖີງ ພາກສ່ວນ ທີ່ ກ່ຽວຂ້ອງ ຂໍໃຫ້ ຊ່ວຍລົງມາ ກວດກາ ແລະ ຕິດຕາມ ແມ່ຄ້າ ຜູາທີ່ໄດ້ ຮັບຄວາມ ເສັຽຫາຍ ຈໍານວນ ຫລາຍຮ້ອຍ ຄົນ ບໍ່ທັນໄດ້ ຮັບຄ່າ ຊົດເຊີຍ ນັ້ນ.