တရုတ်နဲ့ မြန်မာပေါင်းပြီး ကိုဗစ်ကာကွယ်ဆေးထုတ်
ဒါဟာ အရှေ့တောင်အာရှမှာ ပထမဆုံး Sinopharm ရဲ့ ကိုဗစ်ဆေးထုတ် စက်ရုံဖြစ်ပြီးတော့၊ ဒီကိုဗစ်ကာကွယ်ဆေးကို Myancopharm လို့ အမည်ပေးထားတယ်လို့ ဆိုပါတယ်။
- 2022-03-23
-
-
-
တရုတ်အစိုးရနဲ့ စစ်ကောင်စီတို့ပေါင်းပြီး မြန်မာနိုင်ငံမှာ ကိုဗစ်ကာကွယ်ဆေးတွေကို စတင်ထုတ်လုပ်နေပြီလို့ မတ်လ ၂၃ ရက် ဒီကနေ့ တရုတ်သံရုံးက အသိပေး ထုတ်ပြန်ပါတယ်။
တရုတ်ကာကွယ်ဆေး ထုတ်လုပ်ရေး ကုမ္ပဏီကြီးဖြစ်တဲ့ Sinopharm က မြန်မာ စက်မှုဝန်ကြီးဌာနနဲ့ ပူးပေါင်းထုတ်လုပ်မှာလို့ ဆိုပါတယ်။
ဒါဟာ အရှေ့တောင်အာရှမှာ ပထမဆုံး Sinopharm ရဲ့ ကိုဗစ်ဆေးထုတ် စက်ရုံဖြစ်ပြီးတော့၊ ဒီကိုဗစ်ကာကွယ်ဆေးကို Myancopharm လို့ အမည်ပေးထားတယ်လို့ ဆိုပါတယ်။
မြန်မာနိုင်ငံမှာ ကိုဗစ်ဆေးထုတ် လုပ်နိုင်တာဟာ နှစ်နိုင်ငံကြား ကပ်ရောဂါတိုက်ဖျက်ရေး ပူးပေါင်းဆောင်ရွက်မှုရဲ့ ရလာဒ်ကောင်းဖြစ်တယ် မြန်မာနိုင်ငံဆိုင်ရာ တရုတ်သံအမတ်ကြီး Mr Chen Hai က ထုတ်ပြန်ချက်မှာ ပြောထားပါတယ်။
လတ်တလော မြန်မာနိုင်ငံမြောက်ပိုင်းအတွက် တရုတ်ငွေ ယွမ် ၁၀.၅ သန်း တန်ဖိုးရှိ ကိုဗစ်တိုက်ဖျက်ရေး ပစ္စည်းတွေကို တရုတ် အစိုးရဘက်က ထောက်ပံ့ပေးထားပြီး၊ နောက်ထပ် ကာကွယ်ဆေးထိုးအပ် သုံးသန်းလှူဖို့လည်း ရှိသေးတယ်လို့လည်း ဆိုပါတယ်။
ဒီကနေ့ ကိုဗစ်ကာကွယ်ဆေး စတင်ထုတ်လုပ်တဲ့ အခမ်းအနားကို စစ်ကောင်စီဘက်က တာဝန်ရှိသူတွေလည်း တက်ရောက်ကြပါတယ်။